ఆంధ్ర‌ప్ర‌దేశ్ కేంద్రంగా, దేశ‌వ్యాప్తంగా మారుతున్న రాజ‌కీయ స‌మీక‌ర‌ణాల గురించి గ‌త కొద్దిరోజులుగా కొత్త చ‌ర్చ జ‌రుగుతున్న సంగ‌తి తెలిసిందే. 
ఏపీలో అధికారంలో ఉన్న వైసీపీ ఎన్డీఏలో చేరుతుంద‌ని, కేంద్రంలోని బీజేపీ ప్ర‌భుత్వానికి మద్దతు ఇస్తుంద‌నే ప్ర‌చారం జ‌రుగుతోంది. అయితే, దీన్ని వైసీపీ తిప్పికొడుతోంది. అయితే, ఇదే స‌మ‌యంలో బీజేపీ- వైసీపీ మ‌ధ్య ఉన్న సఖ్యత మాత్రం ఎవ‌రూ కాద‌న‌లేని నిజం. అయితే, ఈ స‌మ‌యంలో అంద‌రి చూపు ఏపీ మాజీ ముఖ్యమంత్రి నారా చంద్ర‌బాబు నాయుడుపై ప‌డింది.
ఇదే కొత్త చ‌ర్చ
ఏపీ ముఖ్యమంత్రి వైఎస్ జగన్ ఢిల్లీ టూర్ పుర‌స్క‌రించుకొని కొన్ని మీడియా సంస్థ‌ల్లో ఆస‌క్తిక‌ర క‌థ‌నాలు వ‌చ్చాయి. పోలవరం,రాష్ట్ర ఆర్థిక పరిస్థితులు అని పేర్కొంటూ సాగుతున్న సీఎం జగన్ ఢిల్లీ పర్యటన అసలు రహస్యం మాత్రం ఎన్డీయే లో భాగస్వామ్యం అవ్వడమే అని ఓ పార్టీ అనుకూల మీడియాలో ప్ర‌చారం జ‌రిగింది. ఈ కలయిక లో భాగంగా వైఎసార్సీపి కి కేంద్ర క్యాబినెట్ లో బెర్త్ దొరకనుంది.ఒక కేంద్ర మంత్రి పదవి, కేంద్ర సహాయ మంత్రి పదవి లభించనుంది. కేంద్ర మంత్రిగా విజయసాయి రెడ్డి కి అవకాశం దక్కనుందని కూడా జోస్యం చెప్పేశాయి.
వైసీపీ కొట్టి పారేసింది
అయితే, తాము ఎన్డీఏలో బాగ‌స్వామ్యం అవుతామ‌నే విష‌యం విప‌క్షాల ప్ర‌చార‌మే త‌ప్ప వాస్త‌వం కాద‌ని వైసీపీ తేల్చిచెప్పేసింది. ఏపీ ముఖ్యమంత్రి వైఎస్ జగన్ మోహ‌న్ రెడ్డి న‌మ్మినబంటు, ప్ర‌భుత్వ స‌ల‌హాదారు స‌జ్జ‌ల రామ‌కృష్ణారెడ్డి మీడియాతో మాట్లాడ‌తూ తాము ఎన్డీయేలో చేర‌బోవ‌డం లేద‌ని ప్ర‌క‌టించారు. అంతేకాకుండా ఏపీ సీఎం వైఎస్ జగన్ మోహ‌న్ రెడ్డి ఢిల్లీ పర్యటన రాష్ట్ర ప్ర‌యోజ‌నాల కోసమేన‌ని తేల్చి చెప్పేశారు.
ఆ పెద్దాయ‌న బాబు గాలి తీసేశాడుగా
అయితే, ఈ ప‌రిణామాల‌పై సిపిఐ జాతీయ కార్యదర్శి డాక్టర్ కె.నారాయణ ఆస‌క్తిక‌ర విశ్లేష‌ణ చేశారు. వైయస్సార్ కాంగ్రెస్‌ పార్టీ, బిజెపి ఒకరికి ఒకరు సహకరించకున్నా వారి వారి సిద్ధాంతాలు వేరు. వారి ఓటు బ్యాంక్ వేర‌ని పేర్కొంటూ ఎన్నికలలో వారికి సఖ్యత కుదరదని తెలిపారు. కేంద్రంలోని బీజేపీ ప్రభుత్వం, రాష్ట్రంలోని వైయస్సార్సీపి ప్రభుత్వం విధానాలను ఎండగట్టే విషయంలో టీడీపీ బంగారు అవకాశం కోల్పోయిందని విశ్లేషించారు. దేశంలో, రాష్ట్రంలో ఛాంపియన్‌ ఉండవలసిన టిడిపి ఆత్మహత్యా స‌దృశ్యానికి పాల్పడుతూ బీజేపీకి మద్దతు ఇస్తోందని కామెంట్‌ చేశారు. త‌ద్వారా టీడీపీ అధ్య‌క్షుడు చంద్ర‌బాబు ప‌రిస్థితిని ఎద్దేవా చేశారు.
