తెలుగుదేశం జాతీయ పార్టీ!. ఇలా టీడీపీ నేతలు ప్రకటించుకుంటారే కానీ ఆ పార్టీకి జాతీయ హోదా అనేది ఎన్నికల కమిషన్ నిబంధనల ప్రకారం దక్కలేదు.
అయినప్పటికీ, `స్వయం ప్రకటిత` జాతీయ పార్టీకి అధ్యక్షుడిగా చంద్రబాబు నాయుడు , ప్రధాన కార్యదర్శిగా ఆయన తనయుడు నారా లోకేష్ పదే పదే చెప్పుకొంటుంటారు. కట్ చేస్తే , ఈ స్వయం ప్రకటిత జాతీయ పార్టీ అధ్యక్ష , ప్రధాన కార్యదర్శులకు ఇప్పుడు పరువు పోయే పరిస్థితి ఎదురైందని అంటున్నారు.
బాబు, లోకేష్ ఎక్కడ?
తెలంగాణలో ఇప్పుడందరి చూపు గ్రేటర్ హైదరాబాద్ ఎన్నికలపైనే ఉన్న సంగతి తెలిసిందే. తెలుగుదేశం పార్టీ తెలంగాణలో పూర్తిగా పట్టు కోల్పోయినప్పటికీ, గ్రేటర్ ఎన్నికలతో తమ ఉనికి చాటాలని ప్రయత్నాలు చేస్తోంది. అందుకు తగ్గట్టే దాదాపు 95 స్థానాలు దాకా తమ అభ్యర్థులను బరిలోకి దించింది. ఈరోజు హ్యాపీ హైదరాబాద్ పేరుతో తెలంగాణ తెలుగుదేశం పార్టీ ఒక మేనిఫెస్టో రిలీజ్ చేసింది. ఎన్టీఆర్ ట్రస్ట్ భవన్లో జరిగిన ఈ కార్యక్రమంలో.. పార్టీ ముఖ్య నేతలు పాల్గొన్నారు.
మేనిఫెస్టోలో ఏముంది?
తెలుగుదేశం పార్టీ హయాంలోనే హైదరాబాద్ అభివృద్ధి చెందిందని జీహెచ్ఎంసీ ఎన్నికల మేనిఫెస్టో విడుదల చేస్తూ… టీటీడీపీ అధ్యక్షుడు ఎల్.రమణ అన్నారు. మాటలకే పరిమితమైన టీఆర్ఎస్ పార్టీ కావాలో.. అభివృద్ధి చేసే తెలుగు దేశం పార్టీ కావాలో ప్రజలు ఆలోచించుకోవాలని ఎల్.రమణ అన్నారు. గ్రేటర్ ఎన్నికల్లో టీడీపీని గెలిపిస్తే ప్రతి ఇంటికి మంచి నీటి సరఫరా చేయడంతోపాటు పేదలందరికీ ఉచిత నల్లా కనెక్షన్ అందిస్తామన్నారు. పూర్తిస్థాయిలో వైఫై నగరంగా చేయడానికి కృషి చేస్తామన్నారు. అలాగే ప్రతి ఇంటికి పైప్లైన్ల ద్వారా వంటగ్యాస్ సరఫరా చేస్తామని హామీ ఇచ్చారు. పేదవారందరికీ పక్కా గృహాలు నిర్మిస్తామని.. మేనిఫెస్టోలో తెలిపారు.
ఇంతకంటే పరువు తక్కువ ఏముంటుంది?
గ్రేటర్ పోరులో తెలుగుదేశం పార్టీ ఇచ్చే పోటీ గురించి ఎవరూ పట్టించుకోవడం లేదనేది పచ్చి నిజం. అయినప్పటికీ తమ ఉనికి చాటుకోవలని టీడీపీ ప్రయత్నిస్తోందన్నది కూడా నిజం. అందులో తప్పేం లేదు కూడా. కానీ హైదరాబాద్లోనే ఉన్న తండ్రికొడుకులు కం `స్వయం ప్రకటిత` జాతీయ పార్టీ అధ్యక్షుడు చంద్రబాబు నాయుడు , ప్రధాన కార్యదర్శి నారా లోకేష్ ఎందుకు ప్రచారం ఊసెత్తడం లేదు? కనీసం అసలు గ్రేటర్ పోరు గురించి కూడా పట్టించుకోవడం లేదు అనేది అందరికీ తెలిసిన రహస్యమే! పార్టీ రథసారథులే పట్టించుకోకపోతే… తెలుగుదేశం పార్టీ అభ్యర్థులు , కార్యకర్తలకు ఇంతకంటే అవమానం ఏం ఉంటుందని రాజకీయ వర్గాలు చర్చించుకుంటున్నాయి.