ప్రస్తుతం ప్రపంచవ్యాప్తంగా వినిపిస్తున్న పేరు కరోనా వైరస్…. కరోనా వైరస్ మొదటి వేవ్ ప్రపంచాన్ని అతలాకుతలం చేసింది. ఇప్పుడు కరోనా వైరస్ రెండవ వేవ్ బ్రిటన్ లో విజృంభిస్తుంది. ప్రపంచం మొత్తం బ్రిటన్ వైపు చూస్తోంది. తాజాగా అన్ని దేశాలు బ్రిటన్ నుంచి విమానాల రాకపోకలపై నిషేధం విధించాయి. కరోనా వైరస్ స్ట్రెయిన్ అనేది కరోనా వైరస్ కొత్త రూపం. ప్రస్తుతం బ్రిటన్ లో ఇది విస్తరిస్తుండటమే ఇందుకు కారణం. ఈ సందర్భంగా చరిత్రకారులు మరియు శాస్త్రవేత్తలు అదే బ్రిటన్లో వందేళ్ల కిందట విజృంభించి ప్రపంచవ్యాప్తంగా 3 కోట్ల మందిని పొట్టన పెట్టుకున్న ‘స్పానిష్ ఫ్లూ’ ను గుర్తుచేసుకుంటున్నారు.
1918 సెప్టెంబర్ లో మొదటి ప్రపంచ యుద్ధం దాదాపుగా ముగిసిన సమయంలో యూరప్ నుంచి సైనికులు వారివారి దేశాలకు పయనమవుతున్నందున మూడు సైనిక నౌకలు బయల్దేరాయి. ఫ్రాన్స్, అమెరికా మరియు పశ్చిమ ఆఫ్రికా కు ఈ నౌకలు వెళ్లాయి. ఇక్కడి నుంచి వెళ్లిన సైనికులు హఠాత్తుగా తీవ్ర అనారోగ్యంతో మృత్యువాత పడ్డారు. ఆ తరువాత ఈ వ్యాధి తో ఇతర దేశాలలో కూడా చాలా మంది చనిపోయారు.
1918 మార్చిలో స్పానిష్ ఫ్లూ తొలి కేసు అమెరికాలోని కాన్సాస్ లో నమోదయ్యింది. సైన్యం అక్కడ నుంచి యూరప్ వెళ్లగా అక్కడా ఈ లక్షణాలు బయటపడ్డాయి. ఈ వ్యాధికి సంబంధించిన పూర్తి వివరాలను స్పెయిన్ వెల్లడించటంతో ‘స్పానిష్ ఫ్లూ’ అని పేరు పెట్టారు.
అమెరికాలో తొలికేసు నమోదైన తరువాత 189 మందే చనిపోయారు. ఈ ఫ్లూ సెకండ్ వేవ్ ప్రపంచంలో మారణహోమాన్ని సృష్టించింది. యూరప్ నుంచి ముంబైకి సైనికులతో తొలి నౌక రావడంతో స్పానిష్ ఫ్లూ మన దేశంలో అడుగుపెట్టింది. అప్పటిలో స్పానిష్ ఫ్లూ రెండవ వేవ్ లో విజృంభిస్తే కరోనా వైరస్ మాత్రం తొలి వేవ్ లోనే విజృంభించింది. రానున్న రోజుల్లో కరోనా రెండో వేవ్ తో పెద్ద ప్రమాదం ఉండదని నిపుణులు హెచ్చరిస్తున్నారు.
