Vijay : విజయ్ Vijay తమిళ స్టార్ హీరో విజయ్ కి భారీ ఫ్యాన్ ఫాలోయింగ్ ఉంది. హిట్ ఫ్లాప్ కు అతీతంగా కలెక్షన్లు వస్తూంటాయి. రజినీకాంత్ తర్వాత విజయ్ సినిమాలకు ఆస్థాయి మార్కెట్ ఉంది. ఇళయ దళపతిగా భారీ ఫ్యాన్ బేస్ విజయ్ సొంతం. ఈరోజు తమిళనాడులో అసెంబ్లీ ఎన్నికలు జరుగుతున్నాయి. ఒకే విడతలో జరుగుతున్న ఎన్నికలకు ఓటర్లు పోటెత్తుతున్నారు. ఈ క్రమంలో సినీ సెలబ్రిటీలు కూడా ఓటింగ్ కేంద్రాలకు క్యూ కట్టారు. అయితే.. ఓటు వేసేందుకు కారులో రావాల్సిన విజయ్ భారీ ట్విస్ట్ ఇచ్చాడు. ఇంటి నుంచి సైకిల్ పై ఓటు వేసేందుకు బయలుదేరాడు. ప్రస్తుతం ఈ విషయం తమిళనాడులో సంచలనం రేపింది.
అయితే.. విజయ్ ఇలా సైకిల్ పై రావడానికి కారణం బీజేపీ వ్యతిరేకినని చెప్పకనే చెప్పినట్టు అని వార్తలు వస్తున్నాయి. దేశంలో పెరుగుతున్న పెట్రోల్, డీజిల్, గ్యాస్ ధరలకు వ్యతిరేకంగా తన నిరసన ఇలా తెలియజేశాడని కూడా అంటున్నారు. రాజకీయాలపై నోరు విప్పని విజయ్.. ఇలా సైకిల్ పై వచ్చి బీజేపీ-అన్నాడీఎంకే కూటమికి ఓటు వేయొద్దని ఫ్యాన్స్ కు తన చర్య ద్వారా చెప్పాడని అంటున్నారు. ఇదే నిజమైతే విజయ్ మాటను ఫ్యాన్స్ పాటిస్తే అన్నాడీఎంకే-బీజేపీకి కాస్త దెబ్బ పడినట్టే. కారణం.. విజయ్ పై ఐటీ రైడ్స్ చేయించి చాలా ఇరుకున పెట్టారు. మెర్సల్ సినిమాలో కేంద్ర ప్రభుత్వ విధానాలకు వ్యతిరేకంగా డైలాగులు ఉండటం ఇందుకు కారణమనే వాదనలూ వినిపించాయి.
ఈక్రమంలోనే విజయ్ ఇలా సైకిల్ పై వచ్చి తాను చెప్పాలనుకున్నది చెప్పాడని అంటున్నారు. విజయ్ కు ఉన్న ఫ్యాన్ బేస్, క్రేజ్ తో రాజకీయాల్లోకి ఎంట్రీ ఇస్తాడని కూడా వార్తలు వచ్చాయి. పలు ఫ్యాన్స్ అసోసియేషన్లు కూడా విజయ్ పొలిటికల్ ఎంట్రీపై బ్యానర్లు కూడా కట్టేశారు. వారిని తన ఫ్యాన్స్ కాదని.. వారి సభ్యత్వాలను కూడా రద్దు చేయించాడు విజయ్. అయితే.. విజయ్ తండ్రి చంద్రశేఖర్ రాజకీయ పార్టీ ఏర్పాటు చేస్తున్నట్టు అప్పట్లో ప్రకటించారు. విజయ్ కు ఇందులో సంబంధం లేదని అన్నారు. మొత్తానికి ఎన్నికలు జరుగుతున్నాయి. మరి విజయ్ ఎఫెక్ట్ ఎలా ఉంటుందో చూడాలి.
Lok Sabha Elections 2024: ప్రధాని మోడీ వివాదాస్పద వ్యాఖ్యలు .. ఫిర్యాదులపై ఈసీ పరిశీలన..?