(న్యూస్ ఆర్బిట్ బ్యూరో)
అమరావతి: ముఖ్యమంత్రి వైఎస్ జగన్మోహనరెడ్డిపై టిడిపి నేత, మాజీ ఎమ్మెల్యే వంగవీటి రాధాకృష్ణ తీవ్ర స్థాయిలో విమర్శలు గుప్పించారు. సోమవారం రాధ తుళ్లూరులో రైతుల దీక్షా శిబిరాన్ని సందర్శించి సంఘీభావం తెలిపారు. ఈ సందర్భంగా ఆయన మాట్లాడుతూ రాష్ట్ర ప్రభుత్వానికి కౌన్సిల్‌ను రద్దు చేసే అధికారం లేదని అన్నారు. పెద్దల సభ అనేది సలహాలు, సూచనలు ఇస్తుందని చెప్పారు. ముఖ్యమంత్రి, మంత్రులు ముందుగా రాజ్యాంగం అంటే ఏమిటో తెలుసుకోవాలని రాధ సూచించారు. శాసన, పరిపాలనా వ్యవస్థలు ఒకే చోట ఉండాలన్నారు.
వైఎస్ రాజశేఖరరెడ్డి మృతి చెందిన తరువాత రాష్ట్ర వ్యాప్తంగా ఓదార్పు చేసిన జగన్ నేడు రాజధాని ప్రాంతంలో 30 మంది చనిపోతే ఓదార్పు యాత్ర ఎందుకు చేయలేదని ప్రశ్నించారు. వేలాది మంది రైతులు ఆందోళనతో కుటుంబాలతో సహా రోడ్డుపైకి వచ్చి కూర్చుంటే సిఎం రాకపోయినా మంత్రులు, ఎమ్మెల్యేలైనా వచ్చి పరామర్శించలేదని విమర్శించారు. జగన్ అంతా రెవర్స్ టెండరింగ్‌లో వెళుతున్నారనీ, ఒక సారి రాజీనామా చేసి ఎన్నికలకు వెళితే ప్రజలు కూడా రివర్స్ టెండరింగ్‌లో బుద్ది చెబుతారని రాధ అన్నారు.
అమరావతి ప్రాంత రైతాంగ ఉద్యమాన్ని ఒక కులానికో, వర్గానికో అంటగడుతున్నారనీ, రైతుల త్యాగాలను అవహేళన చేస్తున్నారని రాధ విమర్శించారు.
