Corona Virus: ఏపీలో బయటపడిన కొత్త కరోనావైరస్ వేరియంట్.. మునపటి వైరస్ వేరియంట్ల కంటే 15 రెట్లు అత్యంత తీవ్రమైనదిగా నిపుణులు హెచ్చరిస్తున్నారు. CCMB (సెంటర్ ఫర్ సెల్యులార్ అండ్ మాలిక్యులర్ బయాలజీ) N440K అనే ఈ కొత్త కరోనావైరస్ వేరియంట్ ను కనుగొంది. విశాఖపట్నం, రాష్ట్రంలోని ఇతర ప్రాంతాలలో వేరియంట్ విజృంభిస్తోందని అంటున్నారు. కానీ, ఏపీలో ముందుగా ఈ కొత్త వేరియంట్ జాతిని కర్నూలులో మొట్టమొదటగా కనుగొన్నట్టు చెబుతున్నారు. దీన్నీ ఏపీ స్ట్రెయిన్ గా పిలుస్తున్నారు.
Corona Virus: అత్యంత ప్రమాదకర వేరియంట్ !
మునుపటి కరోనా వైరస్ల కంటే కనీసం 15 రెట్లు ఎక్కువ తీవ్రంగా ఉంటుందని హెచ్చరిస్తున్నారు. కరోనా వేరియంట్లలో భారతీయ వేరియంట్ B1.617, B1.618 వేరియంట్ల కంటే ప్రమాదకరంగా ఉండవచ్చునని అంటున్నారు. ఈ ఏపీ స్ట్రెయిన్ ఎంత ప్రాణాంతకమో ఇంకా నిర్ధారించాల్సి ఉంది. ప్రస్తుతం ఈ జాతికి సంబంధించి నమూనాలను విశ్లేషణ కోసం CCMBకి పంపారు. విశాఖపట్నంలో ప్రస్తుతం విజృంభిస్తోన్న వేరియంట్ గత సంవత్సరం మొదటి వేవ్‌లో మనం చూసినదానికి చాలా భిన్నంగా ఉందని ఖచ్చితంగా చెప్పవచ్చుని సీనియర్ వైద్యులు చెబుతున్నారు.
వేగంగా పాకే వేరియంట్ !
కొత్త వేరియంట్లో తక్కువ పొదిగే కాలంతో పాటు వ్యాధి తీవ్రత చాలా వేగంగా ఉందని గమనించినట్టు తెలిపారు. గతంలో వైరస్ బారిన పడిన రోగి హైపోక్సియా లేదా డిస్ప్నియా దశకు చేరుకోవడానికి కనీసం ఒక వారం సమయం పట్టేది. కానీ ఈ స్ట్రెయిన్ సోకిన బాధితుల్లో మూడు లేదా నాలుగు రోజుల్లో తీవ్రమైన పరిస్థితికి చేరుకుంటున్నారని తెలిపారు. అందుకే ఆక్సిజన్ లేదా ఐసియూ పడకల అవసరం పడుతోందని అంటున్నారు. ఫలితంగా రాష్ట్రంలో వీటి కొరత పెరిగిందని అన్నారు. ఈ స్ట్రెయిన్ సోకిన వ్యక్తి నుండి నలుగురు నుంచి ఐదుగురికి పాకడానికి అవకాశం ఉంటుంది.
ఎవరూ ఈ వేరియంట్ కి అతీతులు కారు!
యువ జనాభాతో పాటు ఫిట్నెస్, అధిక రోగనిరోధక శక్తి ఉన్నవారిపై కూడా పెద్ద ఎత్తున ప్రభావితం చేస్తుందని గుర్తించారు. ఈ వేరియంట్ చాలా తీవ్రమైనదని, అందుకే ప్రతిఒక్కరూ మాస్క్ ధరించడంతో పాటు సామాజిక దూరాన్ని పాటించడం, క్రమం తప్పకుండా చేతులు శుభ్రపరచడం, వీలైనంతవరకూ ఇంట్లో ఉండడం వంటి కోవిడ్ నిబంధనలు పాటించడమే ఉత్తమ మార్గం అని నిపుణులు సూచిస్తున్నారు.
