కరోనా మహమ్మారి కారణంగా దేశ వ్యాప్తంగా లాక్ డౌన్ తో సినిమా థియేటర్లు మూసి వేయ‌డంతో చిత్ర పరిశ్రమ, అలాగే చిత్ర పరిశ్రమ మీదే ఆధారపడి ఉన్న వందలాది కార్మికులు అల్లాడిన విషయం తెలిసిందే. అయితే ఇటీవ‌ల కేంద్రం కొన్ని మార్గ‌ద‌ర్శకాల్ని సూచిస్తూ వాటిని తప్పకుండా పాటిస్తూ థియేటర్లు రీ ఓపెన్ చేసుకోవ‌చ్చ‌ని తెలిపింది. ఇక ఉభ‌య తెలుగు రాష్ట్రాల్లో థియేటర్లు పూర్తిగా ఎప్పుడు రీ ఓపెన్ చేస్తారా అని అంతా ఎదురుచూస్తున్న సమయంలో డిసెంబర్ 4 నుంచి టెనెంట్ సినిమాతో కొన్ని థియేటర్లు తెరుచుకోబోతుండగా, అదే నెల 11 నుంచి మరి కొన్ని థియేటర్లు తెరుచుకునే అవకాశం వుందని తెలుస్తోంది.
ఒకరకంగా సినిమా అభిమానులకు ఇది తీపి వార్తే అని చెప్పాలి. కాగా మెగాహీరో సాయిధరమ్ తేజ్ నటిస్తున్న సినిమా సోలో బ్రతుకే సో బెటర్. ఇప్పటికే షూటింగ్ పూర్తి చేసుకున్న ఈ సినిమా త్వరలో ప్రేక్షకుల ముందుకు రావడానికి సిద్దం అయింది. అయితే ఈ సినిమా రిలీజ్ పై ఇప్పటికే ఓ ప్రముఖ ఓటీటీ సంస్థ భారీ రేటుకు సోలో బ్రతుకే సోబెటరు సినిమాను దక్కించుకుందని ప్రచారం జరిగింది.. కానీ ఈ చిత్రాన్ని థియేటర్ లో విడుదల చేయడానికి చిత్రయూనిట్ సిద్దంగా ఉందని ఈ విషయంలో క్లారిటీ ఇస్తూ ఈ సినిమాను డిసెంబర్ 25 న థియేటర్ లో విడుదల చేయనున్నట్లు పేర్కొన్నారు.
ఇక సోలో బ్రతుకే సో బెటర్ సినిమాతో బాక్సాఫీస్ వద్ద సాయిధరమ్ తేజ్ సందడి మొదలవుతుండగా, రవితేజ ‘క్రాక్’, నాగ చైతన్య ‘లవ్ స్టోరీ’ సినిమాతో పాటుగా, అఖిల్ ‘మోస్ట్ ఎలిజిబుల్ బ్యాచ్‌లర్’.. నితిన్ నటిస్తున్న రంగ్ దే సినిమాతో పాటు మరికొన్ని చిత్రాలు 2021 సంక్రాంతి పండుగ సందర్భంగా రిలీజ్ కు సిద్దంగా ఉన్నాయట. దీన్ని బట్టి చూస్తే ఇన్నాళ్లుగా బోసిపోయిన సినిమా థియేటర్లలో ప్రేక్షకుల సందడి మొదలవుతుందని చెప్పుకుంటున్నారు. మొత్తానికి థియోటర్స్ లో బొమ్మపడబోతోంది కాబట్టి ఈ సంక్రాంతికి సినిమా ప్రేక్షకుల సంబరాలు అంబరాన్ని తాకుతాయో లేదో చూడాలి.
