అటు తిరిగి… ఇటు తిరిగి…జీవన్ రెడ్డి వద్దకు వచ్చి ఆగిన తెలంగాణ పిసిసి కుర్చీ?

కాంగ్రెస్ రాజకీయమే అంత!అనూహ్య నిర్ణయాలు తీసుకోవడంలో ఆ పార్టీకి అదే సాటి!తెలంగాణ రాష్ట్ర పిసిసి కొత్త చీఫ్ నియామకం కూడా అదేవిధంగా సాగబోతోంది.ముందు నుంచి అనుకున్న పేర్లు కాకుండా మరో సీనియర్ నేత పేరు ఈ పదవికి తెరపైకి వచ్చేసింది .రాష్ట్ర పీసీసీ కొత్త చీఫ్ నియామకం ఒకట్రెండు రోజుల్లో తేలిపోనుంది.

పార్టీ రాష్ట్ర వ్యవహారాల ఇన్​చార్జి మాణిక్కం ఠాగూర్ సూచనల మేరకు సోనియాగాంధీ కొత్త చీఫ్ ను ఖరారు చేసినట్టు తెలిసింది. ఇప్పటివరకు రేసులో పేర్లు వినిపించిన రేవంత్ రెడ్డి, కోమటిరెడ్డి వెంకటరెడ్డి కాకుండా కొత్తగా సీనియర్ లీడర్ జీవన్‌ రెడ్డి పేరు తెరపైకి వచ్చింది. పార్టీ లో పరిస్థితుల నేపథ్యం లో ఆయనవైపే కాం గ్రెస్ హైకమాం డ్ మొగ్గు చూపుతున్నట్టు తెలిసింది. ఎంపీ రేవంత్‌‌రెడ్డికి ప్రచార కమిటీ చైర్మన్​ బాధ్యతలు అప్పగించాలని భావిస్తున్నట్టు సమాచారం. అయితే రెం డు పదవులు రెడ్డి వర్గానికే ఇవ్వాలా, వద్దా అన్న విషయంపై తర్జనభర్జన పడుతున్నట్టు తెలిసింది. ఉత్తమ్ పీసీసీ బాధ్యతల నుంచి తప్పుకుని కొత్తవారిని నియమిం చాలని కోరినప్పటి నుంచీ కాంగ్రెస్ లో పోటీ మొదలైంది.

రేసులో రేవంత్ ,కోమటిరెడ్డి!

చీఫ్ పోస్టు కోసం చాలా మంది నేతలు పోటీపడ్డారు. అందులో ఎంపీలు కోమటిరెడ్డి వెంకటరెడ్డి, రేవంత్ రెడ్డిల పేర్లు ప్రముఖంగా వినిపించాయి.

ఆ ఇద్దరిపైనా పెల్లుబుకిన వ్యతిరేకత!

తొలుత రేవంత్ వైపే కాంగ్రెస్ హైకమాండ్ మొగ్గుచూపినట్టుగా వార్తలు వచ్చాయి. దీంతో పార్టీలో అసంతృప్తి సెగలు రేగాయి.తెలుగుదేశం పార్టీ నుండి వచ్చిన రేవంత్ రెడ్డికి ఇప్పటికీ ఆ వాసనలు పోలేదన్న విమర్శలు ఉన్నాయి.వి హనుమంత రావు లాంటి కొందరు సీనియర్లు రేవంత్ కు పీసీసీ ఇవ్వొద్దంటూ బహిరంగంగానే ప్రకటనలు చేశారు. పార్టీ హైకమాండ్ కు లెటర్లు రాశారు.ఇక కోమటిరెడ్డి పేరుపైనా అభ్యంతరాలు వ్యక్తమయ్యాయి. అన్నిటికంటే మించి కోమటిరెడ్డి సోదరుడు’ కాంగ్రెస్ ఎమ్మెల్యే కోమటిరెడ్డి రాజగోపాల్ రెడ్డి త్వరలో బిజెపిలో చేరుతానని బహిరంగంగా ప్రకటన చెయ్యడంతో వెంకట రెడ్డి పేరు వెనక్కి వెళ్లిపోయినట్లు సమాచారం!

ఫస్ట్ ఛాయిస్ గా మారిన జీవన్ రెడ్డి!

దీంతో మొదట్నుంచీ పార్టీ​లో కీలకంగా ఉన్న జీవన్​రెడ్డిని పీసీసీ చీఫ్ గా నియమించాలని హైకమాండ్ ఆలోచనకు వచ్చినట్టు తెలిసింది.జీవన్ రెడ్డి విషయానికొస్తే కరీంనగర్ జిల్లాకు చెందిన ఈ నేత కాంగ్రెస్ పార్టీలోని సీనియర్ మోస్ట్.వివాదరహితుడు కూడా… ఆయనపై గ్రూపుల ముద్ర కూడా లేదు !ఇవన్నీ కలిసి వచ్చి జీవన్ రెడ్డి కి పిసిసి పగ్గాలు లభించనున్నట్లు కాంగ్రెస్ పార్టీ ఉన్నతస్థాయి వర్గాలు చెప్తున్నాయి!