డార్లింగ్ .. యంగ్ రెబల్ స్టార్.. అని పిలుచుకుంటున్న ప్రభాస్ బాహుబలి ఫ్రాంఛైజీ తర్వాత పాన్ ఇండియన్ స్టార్ గా ఎదిగాడు. నిజంగా ప్రపంచ వ్యాప్తంగా ప్రభాస్ కి బాహుబలి సినిమాతో వచ్చిన క్రేజ్ అసాధారణం. ఇది దేశం లో ఏ ఒక్కరు ఊహించనిది. సున్నితమైన మనస్తత్వం కలిగిన ప్రభాస్ ఎక్కువగా జనాల మధ్యలోకి రాలేడు. కాని తన సినిమాలతో మాత్రం ప్రతీ ప్రేక్షకుడు గుండెల్లో నిలిచాడు.
కెరీర్ ప్రారంభం నుంచి చేసిన సినిమాలతో అంచలంచెలుగా ఎదుగుతూ ఈ రోజు పాన్ ఇండియన్ స్టార్ గా ఎదిగాడంటే దాని వెనక ఎంత కృషి, పట్టుదల ఉందో అర్థం చేసుకోవచ్చు. బాహుబలి కోసమే 4 ఏళ్ళ సమయం కేటాయించాడంటే అది కేవలం ప్రభాస్ కి మాత్రమే సాధ్యమైంది. ఆ కష్టం ఈ రోజు ప్రభాస్ కి హాలీవుడ్ హీరో రేంజ్ లో పాపులారిటీని తెచ్చి పెట్టింది. ప్రస్తుతం ప్రభాస్ చేస్తున్న సినిమాలు.. ఆయనకి ఉన్న మార్కెట్ .. క్రేజ్ ఇదంతా ఇప్పుడున్న సౌత్ అండ్ నార్త్ హీరోలలో ఏ ఒక్కరు అందుకోలేరన్నది ఒప్పుకొని తీరాల్సిందే అంటున్నారు విశ్లేషకులు. అందుకు కారణం ప్రస్తుతం ప్రభాస్ చేస్తున్న భారీ బడ్జెట్ సినిమాలే.
బాహుబలి సినిమాతో ప్రభాస్ రేంజ్ ఊహించని విధంగా మారిపోయింది. ‘బాహుబలి 2’ తర్వాత ప్రభాస్తో యువి క్రియేషన్స్ సుజీత్ దర్శకత్వంలో తెలుగు, తమిళ్, హిందీ భాషల్లో భారీ బడ్జెట్తో నిర్మించిన ప్యాన్ ఇండియన్ సినిమా ‘సాహో’ హాలీవుడ్ సినిమాకి ఏమాత్రం తగ్గలేదని ప్రూవ్ చేసింది. హైటెక్నికల్ వేల్యూస్తో నిర్మించిన సాహో తో బాలీవుడ్లో మంచి మార్కెట్ ని ఏర్పరచుకున్నాడు. ప్రస్తుతం ప్రభాస్ కెరీర్ లో 20వ సినిమాగా రాధాకృష్ణ కుమార్ తెరకెక్కిస్తున్న ‘రాధేశ్యామ్’ మీద ఇప్పటికే భారీ అంచనాలు నెలకొన్నాయి.
ఇక ప్రముఖ నిర్మాణ సంస్థ వైజయంతీ మూవీస్ 50 సినిమాగా ఎంతో ప్రతిష్టాత్మకంగా ప్రభాస్ తో 21 వ సినిమాని నిర్మిస్తోంది. నాగ్ అశ్విన్ దర్శకత్వం వహించబోతుండగా ప్రముఖ సీనియర్ దర్శకులు సింగీతం శ్రీనివాస్ క్రియోటివ్ హెడ్ గా వ్యవహరిస్తున్నారు. దీపిక పదుకొణె హీరోయిన్ గా బాలీవుడ్ మెగాస్టార్ బిగ్ బి అమితాబ్ బచ్చన్ కీలక పాత్రలో నటిస్తున్న ఇప్పటి వరకు మేకర్స్ అధికారకంగా వెల్లడించారు.
అలాగే ప్రభాస్ హీరోగా బాలీవుడ్ దర్శకుడు ఓం రౌత్ దర్శకత్వంలో ‘ఆదిపురుష్’ అనే ఎపిక్ విజువల్ వండర్ రూపొందబోతుంది. ఈ సినిమాలో ప్రభాస్ రాముడిగా నటిస్తుండగా సైఫ్ అలిఖాన్ లంకేష్ గా నటించనున్నాడు. గుల్షన్ కుమార్, టి. సిరీస్ ఫిలిమ్స్ సమర్పణలో రెట్రోఫైల్స్ ప్రొడక్షన్, టి సిరీస్ ఫిలిమ్స్ బ్యానర్ పై భూషణ్ కుమార్, కృష్ణ కుమార్, ప్రసాద్ సుతార్, రాజేష్ నాయర్ భారీ బడ్జెట్ తో అత్యంత ప్రతిష్టాత్మకంగా నిర్మిస్తున్నారు. ఇలా ప్రభాస్ ఊహించని బడ్జెట్ తో భారీ సినిమాలను చేస్తూ ఎవరికి అందనంత ఎత్తుకి చేరుకున్నాడు.