Children: పిల్లలు పుట్టిన 6-12 నెలలు వచ్చేవరకు రోజు చూసే వారిని గుర్తుపట్టడం, పేరు పెట్టి పిలిస్తే అటువైపుగా తిరగడం చేస్తుంటారు. వద్దు, టాటా అన్నట్టుగా చేతులు కదుపుతుంటారు. కొత్త ముఖం కనిపిస్తే ప్రక్కకు తిరిగిపోతారు, తల్లి వదిలి వెళితే పేచీలు పెట్టేస్తూ ఉంటారు .
ఆ వయసులో ఉన్న పిల్లలకు ఆట వస్తువులు ఇవ్వడం తో పాటు మీరు కూడా కూర్చుని వారితో ఆడుకోవాలి . 1-2 సంవత్సరాలు ఉన్న పిల్లలు చిన్న చిన్న పదాలను ఉపయోగిస్తూ,లయబద్ధంగా కాళ్ళు, చేతులు కదిలిస్తూ పాటలు పాడతారు. చిన్న చిన్న పనులు చెబితే చేస్తుంటారు. తోటి వయసు పిల్లలను చూసి నవ్వుతుంటారు.
రెండేళ్ళు వచ్చేసరికి మలమూత్ర విసర్జన అవసరాన్ని ముందే తెలియజేస్తారు. పిల్లలను కుటుంబ సభ్యులతో, తరచుగా ఇంటికి వచ్చే అతిధులను ఒకటికి రెండు సార్లు పరిచయం చేస్తుండాలి. అతిధులను పెద్దవారిని ‘ నమస్తే ‘ అని గౌరవప్రదమైన మాటలు, చేతలతో పలకరించడం ఆ వయస్సు నుంచే అలవాటు చేయాలి .
వారంతట వారే భోజనం చేయడం, నీళ్ళు తాగడం వంటి వాటిని ప్రోత్సహిస్తూ ఉండాలి. ఇంట్లో తనకంటే చిన్న పిల్లల తో ఆడుకునే విధం గా చూడాలి. మార్కెట్ కు తీసుకు వెళ్ళేటప్పుడు , దారిలో కనిపించే వస్తువులు, మనుష్యులను, నిత్యం చూసే వాహనాలు, రోజూ వాడుకునే కూరగాయలు చూపిస్తూ వాటి పేర్లు చెప్పండి .
ఇంట్లో ఉండే ఇతర సభ్యుల బంధుత్వం గురించి కూడా బిడ్డకు తెలియచేస్తూ ఉండాలి. 2-3 సంవత్సరాల పిల్లలకు బట్టలు వేసుకోవడం, తీయడంలో సహకరిస్తూ నేర్పించాలి. వారంతట వారు భోజనం చేయడం, కంచం, గ్లాసు వంటి వస్తువులు పట్టుకోవడం వంటివి చేయగలుగుతారు. వారంతట వారే కాళ్ళు, చేతులు, ముఖం కడుక్కో గలరు.
తనకు కావాల్సింది అడగడం, నిర్ణీత సమయం మరియు ప్రదేశం లో మలమూత్ర విసర్జన చేయడానికి అలవాటు పడతారు. బిడ్డ తన బట్టలు తానే వేసుకోవడం, తీసుకోవడాన్ని ప్రోత్సహిస్తూ ఉండాలి.
