ఆంధ్ర రాష్ట్రంలో రాజధాని విషయంలో తాము ఎట్టి పరిస్థితుల్లోనూ కలుగజేసుకోబోమని కేంద్ర ప్రభుత్వం ఇప్పటికే న్యాయస్థానానికి తేల్చి చెప్పేసింది. దీంతో ఏపీలోని ప్రతిపక్షాలు అన్నీ బిక్కముఖం వేశాయి. ఇక రాష్ట్రంలో రెండు కీలక జిల్లాలు అయిన పశ్చిమ గోదావరి, తూర్పు గోదావరి జిల్లాలు ఈ దెబ్బతో ఖుషి అయిపోయినట్లే అని అంతా అనుకున్నారు. నిజానికి రాష్ట్రంలో ఏ పార్టీ అధికారంలోకి రావాలన్న ఈ రెండు జిల్లాలు అత్యంత కీలకం. భిన్నమైన అభిరుచులు, వ్యాపారాలు, వ్యవహారాలు ఉన్న ఈ జిల్లాలకు రాష్ట్రంలోనే కాకుండా దేశంలో కూడా మంచి పేరుంది.సినిమాల్లో, రాజకీయాల్లో ఎప్పుడు యాక్టివ్ గా ఉండే ఈ జిల్లా వాసులు తమదైన శైలిలో దూసుకుపోతున్నారు. అయితే ఒక్కసారిగా ఈ రెండు జిల్లాల నుండి వస్తున్న 3 రాజధానులకు సంబంధించి వ్యతిరేక వైఖరి ఇప్పుడు వైసీపీ ని కలవరపెడుతోంది.
వివరాల్లోకి వస్తే…. రెండు గోదావరి జిల్లాలు ఉత్తరాంధ్ర కు సంబంధించినవి కాబట్టి విశాఖ రాజధానిగా తమ సంపూర్ణ మద్దతు తెలుపుతారని ఆశించినా కూడా ఈ రెండు జిల్లాల విషయాన్ని విడివిడిగా విశ్లేషిస్తే…. పరిస్థితి కొద్దిగా తేడాగా ఉంటుంది. పశ్చిమగోదావరిలో కొన్ని ప్రాంతాల వారు అంటే మెట్ట-డెల్టా ప్రాంతానికి చెందిన ప్రజలు తమ కోణంలో రాజధానిని కోరుకుంటున్నారు. మెట్ట ప్రాంతంలో వారికి కృష్ణా జిల్లాతో అనుబంధం ఎక్కువ. విజయవాడ-గుంటూరు లతో కూడిన అమరావతిని రాజధానిగా కోరుతున్నారు. అంతేకాకుండా విజయవాడ తో అనుబంధం ఉన్న పశ్చిమ, వైసీపీ నేతలు కూడా అమరావతి రాజధానిగా ఉండాలని లోపల కోరుకుంటున్నారు.
ఇక కొందరు పశ్చిమగోదావరి ప్రజలు విశాఖను రాజధానిగా కోరుకుంటూ ఉండడం గమనార్హం. వీరిలో తటస్థ వాతావరణం నెలకొంది. రాజమండ్రి కి ఆనుకుని ఉన్న కొవ్వూరు, నిడదవోలు నియోజకవర్గంలో పెట్టుబడిదారులకు ఇప్పటికే వైజాగ్ తో ఎక్కువ అనుబంధం. వారు వైజాగ్ ను రాజధానిగా కోరుకుంటున్నారు. ఇక తూర్పుగోదావరి జిల్లా విషయానికి వస్తే వీరంతా కూడా దాదాపు విశాఖను రాజధానిగా కోరుకుంటున్నారు. తమకు రాజధాని అత్యంత చేరువలో ఉంటుంది అన్న అభిప్రాయం బలంగా నాటుకుపోయింది.
అలాగే కాకినాడ తో పాటు కాకినాడ లోక్ సభ, సీమ ప్రజలకు విజయవాడ కంటే వైజాగ్ తోనే అనుబంధం ఎక్కువ. వైజాగ్ రియల్ ఎస్టేట్ తో పాటు అక్కడ ఇండస్ట్రీలో ఈ జిల్లావాసులు భారీ పెట్టుబడులు పెట్టారు. ఈ క్రమంలోనే తమకు అన్ని విధాలా విశాఖ అనువుగా ఉంటుందని వారి భావన. మరి ఈ రెండు జిల్లాల ప్రజల మధ్య ఎవరి ఆకాంక్ష చివరికి నెరవేరుతుంది అనేది ఎక్కువగా కనిపిస్తోంది.
