ఉక్రెయిన్ అధ్యక్షుడు జెలెన్ స్కీమ్ రోడ్డు ప్రమాదంలో గాయపడ్డారు. ఈ ఘటనలో ఆయన స్వల్ప గాయాలతో బయటపడటంతో అందరూ ఊపిరిపీల్చుకున్నారు. అధ్యక్షుడి కాన్వాయ్ రాజధాని కీవ్ లో ప్రయాణిస్తుండగా ఎదురుగా వస్తున్న కారు జెలెన్ స్కీ వాహనాన్ని ఢీకొట్టింది. ఈ విషయాన్ని మీడియాకు జెలెన్ స్కీ ప్రతినిధి సెర్హీ సైకిఫోరోవ్ తెలిపారు. ఈ ఘటనలో ఆధ్యక్షుడు స్వల్పంగా గాయపడ్డారని పేర్కొన్నారు. జెలెన్ స్కీ వెంట ఉన్న వైద్యులు అధ్యక్షుడితో పాటు కారు డ్రైవర్ కు వెంటనే చికిత్స అందించారనీ అనంతరం జెలెన్ స్కీని అంబులెన్స్ లో తరలించారని చెప్పారు. అధ్యక్షుడికి తీవ్ర గాయాలు ఏమీ కాలేదని తెలిపారు. ఈ ఘటనపై పోలీసులు సమగ్ర విచారణ చేపడతారని సెర్హీ వెల్లడించారు. ఇది సాధారణ ప్రమాదమా లేక ఇందులో ఏదైనా కుట్ర దాగి ఉందా అనేది పోలీసు దర్యాప్తులో తేలనున్నది.
కాగా రష్యాతో ఉక్రెయిన్ భీకర పోరాటం చేస్తొంది. ఇటీవల దూకుడుగా విరుచుకుపడుతోంది. వ్యూహాత్మక ప్రాంతాలను రష్యా నుండి తిరిగి స్వాధీనం చేసుకుంటోంది. జెలెన్ స్కీ రీసెంట్ గా ఓ టీవీలో మాట్లాడుతూ .. ఖార్ఖిన్ నుండి రష్యా బలగాలు వెనక్కి మళ్లాయని ప్రకటించారు. ఆ ప్రాంతాన్ని తమ దళాలు పూర్తిగా స్వాధీనం చేసుకున్నాయని అన్నారు. ఈ నెల ప్రారంభం నుండి రష్యా ఆధీనంలోని ఆరు వేల కిలో మీటర్ల కంటే అధిక భూభాగాన్ని తమ దళాలు హస్తగతం చేసుకున్నట్లు ప్రకటించారు. ఇది అపూర్వమైన ఘటన అని జెలెన్ స్కీ పేర్కొన్నారు. జెలెన్ స్కీ ఆ వ్యాఖ్యలు చేసిన కొద్ది గంటల్లోనే ఈ ప్రమాదం జరగడం గమనార్హం.
