(విశాఖ నుండి “న్యూస్ ఆర్బిట్” ప్రతినిధి)
తెలంగాణలో అందరి చూప గ్రేటర్ హైదరబాద్ మున్సిపల్ ఎన్నికల వైపు ఉండగా ఆంధ్రప్రదేశ్లో అందరి చూపు గ్రేటర్ విశాఖ మున్సిపల్ కార్పోరేషన్ ఎన్నికలపై ఉంది. వైఎస్ జగన్మోహనరెడ్డి విశాఖను పరిపాలనా రాజధానిగా విశాఖను ప్రకటించిన విషయం తెలిసిందే. గడచిన ఎన్నికల్లో రాష్ట్ర వ్యాప్తంగా వైసీపీ ఫ్యాన్ గాలి బలంగా వీచినప్పటికీ విశాఖ పట్టణంలోని నాలుగు అసెంబ్లీ స్థానాలు టీడీపీ కైవశం చేసుకున్నది. దీంతో పరిపాలనా రాజధానిగా ప్రకటించిన విశాఖలో టీడీపీ అడ్రస్ గల్లంతు చేయాలన్న తలంపుతో వైసీపీ అక్కడి టీడీపీ ఎమ్మెల్యేలకు గాలం వేసే ప్రక్రియను ప్రారంభించింది. ఒక ఎమ్మెల్యే వాసుపల్లి గణేష్ బాబు వైసీపీ పంచన చేరగా మాజీ మంత్రి, సీనియర్ నేత గంటా శ్రీనివాసరావు వైసీపీ గూటికి చేరేందుకు ఎప్పుడు గ్రీన్ సిగ్నల్ వస్తుందా అన్నట్లు కాలికి చెప్పులు తొడుక్కొని రెడిగా ఉన్నారు. ఈ సారి జరగబోయే ఎన్నికల్లో గ్రేటర్ విశాఖ మేయర్ పీఠాన్ని దక్కించుకోవాలన్న కృత నిశ్చయంతో వైసీపీ ఉన్నది. ఇటీవల టీడీపీ నుండి వైసీపీ పంచన చేరిన ఎమ్మెల్యే వాసుపల్లి గణేష్ బాబు ఇదే విషయాన్ని చెప్పారు. విశాఖ నగర మేయర్ స్థానాన్ని జగన్కు గిఫ్ట్ గా ఇస్తామని అయన అన్నారు.
ఇప్పటికిప్పుడు గ్రేటర్ విశాఖ ఎన్నికలు వస్తే ఏ పార్టీకి ఎన్ని సీట్లు వస్తాయి ? అనే దానిపై వీడీపీ అసోసియేట్స్ అనే సంస్థ సర్వే నిర్వహించింది. ఈ సర్వేలో వారికి ఆసక్తికరమైన ఫలితాలు వెల్లడి అయ్యాయట. ఈ సర్వే ఫలితాలు అలా ఉంచితే వైఎస్ఆర్ సీపీకి మాత్రం ఇది జోష్ ఇస్తోంది.
ఆ సంస్థ సర్వే ఫలితాలు ఏ విధంగా ఉన్నాయంటే..
వైఎస్ఆర్ సీపీకి 49.8 శాతం ఓట్ల షేర్తో 84 నుండి 89 సీట్లు కైవశం చేసుకునే అవకాశం ఉందని, టీడీపీ 36.5 శాతం ఓట్ల షేర్తో 8 నుండి 14 సీట్లు, ఇండిపెండెంట్లు, ఇతరులు 5.1 శాతం ఓట్ల షేర్తో సున్నా నుండి ఒకటి సీట్లు వస్తాయని లెక్కలేసింది. జనసేనకు 4.1 శాతం. బీజెపీకి 2.8 శాతం, కాంగ్రెస్ పార్టీకి 1.7 శాతం ఓట్లు వస్తాయని ఆ సంస్థ పేర్కొన్నది. మొత్తం 98 స్థానాలు ఉన్న విశాఖ నగర పాలక సంస్థలో 84 నుండి 89 స్థానాలు వైఎస్ఆర్ సీపీ కైవశం చేసుకుని స్వీప్ చేస్తుందని వెల్లడించింది. టీడీపీ కేవలం 8 నుండి 14 సీట్లు మాత్రమే కైవశం చేసుకునే అవకాశం ఉన్నట్లు తెలిపింది. జనసేన, బీజేపి, కాంగ్రెస్ పార్టీలు బోణి కూడా కొట్టే పరిస్థితి లేదన్నట్లు ఆ సంస్థ సర్వే ఫలితాలు ఉన్నాయి. సో..విశాఖలో అధికార పార్టీ.. రాజధాని మంత్రం పనిచేస్తుందన్న మాట.
https://twitter.com/vdpa_research/status/1316345694630731777