వరంగల్లు : తొమ్మిది నెలల చిన్నారిని అత్యంత పాశవికంగా అత్యాచారం చేసి హతమార్చిన నిందితుడు ప్రవీణ్‌కు వరంగల్లు జిల్లా ఫాస్ట్‌ట్రాక్ కోర్టు ఉరి శిక్ష విధిస్తూ గురువారం సంచలన తీర్పు వెలువరించింది. ఘటన జరిగిన 48రోజుల్లోనే విచారణ పూర్తి చేసి శిక్ష ఖరారు చేయడం గమనార్హం. ఈ ఏడాది జూన్ 19న వరంగల్లు అర్బన్ జిల్లా హన్మకొండలోని టైలర్ స్ట్రీట్‌లోని పాలచందాలో తొమ్మిది నెలల చిన్నారిపై ప్రవీణ్ అనే యువకుడు అత్యంత పాశవికంగా లైంగికదాడికి పాల్పడి గొంతు నులిమి హత్య చేశాడు. నిందితుడు ప్రవీణ్‌పై గతంలోనే రెండు అత్యాచర కేసులు ఉన్నట్లు తెలుస్తోంది. ఈ కామాంధుడిని బహిరంగంగా ఉరి తీయాలంటూ మహిళా సంఘాలు డిమాండ్ చేశాయి. ఈ కేసులో 30మంది సాక్షులను విచారించిన న్యాయమూర్తి జయకుమార్ గురువారం సంచలన తీర్పు వెలువరించారు.
