WhatsApp Scam: వాట్సాప్ వాడే యూజర్లందరినీ తాజాగా సైబర్ నిపుణులు హెచ్చరించారు. సైబర్ నేరగాళ్లు వాట్సాప్ వినియోగదారులను బురిడీ కొట్టించి వారి డబ్బంతా కొల్లగొట్టేందుకు కొత్త స్కామ్ కు తెరలేపినట్టు వెల్లడించారు. యూజర్లు అప్రమత్తంగా ఉండకపోతే నిలువునా మోసం పోయే ప్రమాదం ఉందని సూచించారు. న్యూ ఇయర్ వేళ వాట్సాప్ లో బహుమతుల పేరిట సరికొత్త స్కామ్ హల్చల్ చేస్తోంది. ఇంతకీ ఈ స్కామ్ ఏంటి? సైబర్ మోసగాళ్ల బారిన పడకుండా ఎలాంటి జాగ్రత్తలు తీసుకోవాలి? లాంటి విషయాలు తెలుసుకుందాం.
వాట్సాప్లో రెడిరోఫ్.ఆర్యూ అనే ఓ ఫిషింగ్ లింక్
సైబర్ మోసగాళ్లు ఫిషింగ్ పద్ధతిలో యూజర్ల బ్యాంకు, క్రెడిట్, డెబిట్ కార్డు వివరాలను తస్కరిస్తున్నారు. వీళ్లు Rediroff.ru అనే పేరుతో ఒక యూఆర్ఎల్ లింక్ గల వాట్సాప్ మెసేజ్ ను పంపిస్తారు. మోసగాళ్లు ఈ మెసేజ్ లో న్యూ ఇయర్ గిఫ్ట్ గెల్చుకున్నారంటూ యూజర్లకు నమ్మ బతుకుతారు. అది నిజమేనని క్లిక్ చేయగానే ఒక ఫేక్ వెబ్సైట్ ఓపెన్ అవుతుంది. అందులో యూజర్లు ఒక గిఫ్ట్ గెలుచుకున్నట్లు సందేశం కనిపిస్తుంది. దాన్ని సేకరించడానికి పేరు, వయసు వంటి వ్యక్తిగత వివరాలతో పాటు బ్యాంకు వివరాలు ఇవ్వాల్సిందిగా ఆ ఫేక్ వెబ్సైట్ అడుగుతుంది. మీ వివరాలన్నీ ఇస్తే.. మోసపోయినట్లే. సున్నితమైన మీ సమాచారాన్ని సేకరించిన మోసగాళ్లు మీ బ్యాంకు ఖాతాని ఖాళీ చేస్తారు. లేదా ఫేక్ వెబ్సైట్ ద్వారా మీ మొబైల్ ఫోన్ లోకి మాల్వేర్ ప్రవేశపెడతారు.
సురక్షితంగా ఎలా ఉండాలి
Rediroff.ru లింక్ తో వచ్చే వాట్సాప్ మెసేజ్ లను ఎట్టి పరిస్థితులలో క్లిక్ చేయకూడదు. పొరపాటున క్లిక్ చేసినా తక్షణమే మీ డివైజ్ను మంచి యాంటీవైరస్ సాఫ్ట్వేర్ తో ఫుల్ స్కాన్ చేయండి. వాట్సాప్ లో మీరు గిఫ్ట్స్ గెలిచినట్లు వచ్చే మెసేజ్ లన్నీ ఫేక్ అని గమనించాలి. ఎందుకంటే ఏ కంపెనీ కూడా వాట్సాప్ ద్వారా బహుమతులను అందించదు. అలాగే అపరిచితులు పంపే లింకులను ఎప్పుడూ కూడా క్లిక్ చేయకూడదు. వాటిని వెంటనే డిలీట్ చేసి రిపోర్ట్ చేయడం ద్వారా మంచిది.