ఈ వార్త చదివే ముందు సమాజం చచ్చిపోయింది అని.., సోషల్ మీడియాలో ఉన్నందుకు సిగ్గుపడుతున్నాం… అని కాసేపు తల దించుకుందాం..! వినడానికి, రాయడానికి, చదవడానికి కూడా మెదడులో ప్రళయం కలిగే చెండాలపు సంస్కృతిని ఓ సారి చూసొద్దాం..!!
సోషల్ మీడియా యూజర్లకు పెళ్ళాలు ఉండరా..? పిల్లలు ఉండరా..!? వారి విలువలు తెలియవా..? మానవతా విలువలు ఏ మాత్రం పరిచయం లేవా..? ఇవన్నీ ఉన్నా అవసరం లేదా..?? ట్రోల్ చేయడమే పనిగా వికృతంగా చెలరేగడానికే దీన్ని యూజ్ చేస్తుంటారా..? ఏమో ఈ చెండాలపు సంస్కృతి ఉంటె ఏదో దేశాన ఉంటె ఉండనీ… కానీ యువగళం.., యువనరం.., యువ రక్తం ఎక్కువగా ఉన్నా భారతానా మాత్రం వద్దు..! ముక్కు పచ్చలారని పసికందుని రేప్ చేస్తామని బెదిరించడం ఏంటి..? పెళ్ళాంని నిందించడం ఏంటి..? క్రికెటర్ సరిగా ఆడకపోతే వాళ్ళు ఏం చేస్తారు..?
ఇదిగో ఈ పాప వయసు ఐదేళ్లు..! పసిబుగ్గలు, చూస్తే గారాబం చేయాలనిపించే చిన్నారితల్లి..! ధోని బిడ్డ. ఆ ధోని మహానుభావుడు ఐపీఎల్ లో సరిగా బాటింగ్ చేయడం లేదని.. ఈ దరిద్రపు సోషల్ మీడియా ఆ చిన్నారిని టార్గెట్ చేసింది. ట్రోల్ చేసింది. ఆ చిన్నారిని రేప్ చేస్తాం అంటూ బెదిరించింది. సోషల్ మీడియాలో ఆ చిన్నారిని నిన్న ఉదయం నుండి ట్రోల్ల్స్ చేస్తూ ఇష్టానుసారం మాట్లాడుతున్నారు. ఏమైంది.. ఈ యువ దేశానికి ఏమైంది..? చెన్నై గెలవకపోతే ఆ పాపది పాపమా..? ధోనీ ఆడకపోతే ఆ పాపకి శాపమా..? అసలు ఐపీఎల్ కి ఆ చిన్నారికి సంబంధం ఏంటి..? క్రికెట్ కి ఆ పాపకి సంబంధం ఏంటి..? ధోని ఆడకపోతే ధోనిని తిట్టుకోవచ్చు కదా..?? వికృత కామెంట్లు, తిట్లతో ధోనీని ఆడుకోవచ్చు కదా..!! పిల్లలు, పెళ్ళాలు ఏం చేసినట్టు..?
అయినా ముందు అనాల్సింది సునీల్ గవాస్కర్ అనే పెద్దాయనని..! ఐపీఎల్ లో కోహ్లీ విఫలమవుతున్నాడని అనుష్క శర్మని అన్నాడు. అక్కడ ఊతమిచ్చినట్టు ఇక మొదలయింది. సోషల్ మీడియాలో యుద్ధం. క్రికెటర్లకు కుటుంబాలను, బంధాలను నిందించడం ఇదే మొదటిసారి కాదు. కానీ పసిపిల్లలను రేప్ చేసేస్తాం అనడం మాత్రం ఇదే మొదటిసారి. అందుకే దేశం యావత్తు ఆశ్చర్యపోతుంది. బాలీవుడ్ నటులు, దేశ ప్రముఖులు ధోనీ పాపకి మద్దతు పలుకుతున్నారు. ఇప్పుడు కావాల్సింది మద్దతు, సానుభూతి కాదు. ఆ ట్రోలింగ్ మొదట స్టార్ట్ చేసిన వాడిని కనిపెట్టాలి. ఈ వికృతానికి వాడ్ని బలిచేయాలి.