వైసీపీ కీలక నిర్ణయం.. ప్లీనరీలో ఎల్లుండి తీర్మానం

రేపటి నుండి వైసీపీ ప్లీనరీ సమావేశాలు జరగనున్న సంగతి తెలిసిందే. గుంటూరు ఆచార్య నాగార్జున యూనివర్శిటీకి ఎదురుగా వైసీపీ ప్లీనరీకి పెద్ద ఎత్తున ఏర్పాట్లు జరిగాయి. ప్లీనరీ నిర్వహణకు వివిధ కమిటీలను ఏర్పాటు చేశారు. పార్టీ జాతీయ ప్రధాన కార్యదర్శి విజయసాయిరెడ్డి, రాష్ట్ర ప్రధాన కార్యదర్శి సజ్జల రామకృష్ణారెడ్డి తదితర నేతలు, మంత్రులు ప్లీనరీ ఏర్పాట్లను పర్యవేక్షించారు. వైసీపీ అధికారంలోకి వచ్చిన తరువాత జరుగుతున్న మొదటి ప్లీనరీ కావడంతో భారీ ఎత్తున ఏర్పాట్లు జరిగాయి. 2017 లో వైసీపీ ప్లీనరీ జరిగింది. ఆ తరువాత ఇప్పుడే ప్లీనరీ జరుగుతోంది. ఈ  సమావేశాల్లో పలు కీలక నిర్ణయాలను తీసుకోనున్నారు.

వైసీపీ శాశ్వత అధ్యక్షుడుగా వైఎస్ జగన్ ను ప్రకటిస్తూ తీర్మానం చేయనున్నారు. ఈ మేరకు నియామకాల నిబంధనల్లో మార్పులు చేయనున్నారు. ఎల్లుండి వైసీపీ అధ్యక్ష ఎన్నిక జరగాల్సి ఉంది. ఈ సందర్భంగా తీర్మానంలో పార్టీ ప్రకటించే అవకాశాలు ఉన్నాయి. ఇకపై ప్రతి సారి జరిగే ప్లీనరీలో అధ్యక్ష లేకుండా శాశ్వత అధ్యక్షుడుగా జగన్ ను నియమిస్తూ తీర్మానం చేయనున్నారు. ఈ ప్లీనరీలో కీలక తీర్మానాలు చేయనున్నట్లు ఇప్పటికే విజయసాయి రెడ్డి ప్రకటించారు. పార్టీ నియమావళిలో సవరణలను తీసుకువస్తున్నట్లు తెలిపారు.

వైఎస్ఆర్ సీపీ ప్రారంభించి 12 సంవత్సరాలు అవుతోంది. అప్పటి నుండి జగన్మోహనరెడ్డి పార్టీ అధ్యక్షుడుగా ఉన్నారు. కాగా ప్లీనరీలో తొలి రోజు లక్షా 50వేల మంది ప్రజా ప్రతినిధులు, కార్యకర్తలు పాల్గొంటారని అంచనా. రేపు, ఎల్లుండి రెండు రోజులు పార్టీ అధినేత, సీఎం వైఎస్ జగన్ ప్లీనరీలోనే ఉంటారని సమాచారం. వివిధ అంశాలపై చర్చించి తీర్మానాలు చేశారు. రేపు జగన్ ప్రారంభోపన్యాసం చేస్తారు. అనంతరం తీర్మానాలపై చర్చ ఉంటుంది. ఎల్లుండి నేతల ప్రసంగాలు, సాయంత్రం బహిరంగ సభలో ప్లీనరీ ముగియనుంది. ఎల్లుండి బహిరంగ సభకు అయిదు లక్షలకు పైగా వస్తారని అంచనా.