అమరావతి: రాష్ట్రంలో ఘోరంగా ఓడిపోయిన అక్కసుతోనే టిడిపి శాసనసభలో రాద్ధాంతం చేస్తోందని వైసిపి ఎమ్మెల్యే ఆర్‌కె రోజా ఆరోపించారు. అసెంబ్లీ మీడియా పాయింట్ వద్ద మంగళవారం ఆమె మాట్లాడుతూ సభా సాంప్రదాయాల గురించి చంద్రబాబు, ఆ పార్టీ సభ్యులు మాట్లాడటం దయ్యాలు వేదాలు వల్లించినట్లు ఉందని అన్నారు. బడ్జెట్‌పై మాట్లాడే ధైర్యం లేక చంద్రబాబు పారిపోయి బుచ్చయ్యచౌదరికి మైక్ ఇచ్చారని రోజా ఎద్దేవా చేశారు. నేడు సభ సక్రమంగా జరగకుండా చేయడం కోసమే శాంతి భద్రతలపై టిడిపి వాయిదా తీర్మానం ఇచ్చి రాద్ధాంతం చేస్తోందని రోజా ఆరోపించారు. ఐదేళ్ల పాటు వారు సభలో ఎలా వ్యవహరించారో రాష్ట్ర ప్రజలందరికీ తెలుసునని రోజా అన్నారు. ఏమి తెలియని నంగనాచిలాగా వారు ఇప్పుడు మాట్లాడుతున్నారని రోజా దుయ్యబట్టారు. గత సభలో అచ్చెన్నాయుడు మాట్లాడిన భాష, ప్రదర్శించిన హావభావాలు అందరికీ తెలుసునని రోజా అన్నారు.
జగన్ గురించి గతంలో అచ్నెన్నాయుడు సభలో మాట్లాడిన భాష సభ్య సమాజం సిగ్గుపడే విధంగా ఉందని రోజా గుర్తు చేశారు. వారు ప్రవర్తించిన తీరు వల్లనే ప్రజలు ఛీకొట్టారనీ, టిడిపిని 23 సీట్లకే పరిమితం చేశారని రోజా అన్నారు. ప్రజలు చంద్రబాబును అసహ్యించుకుంటున్నారని రోజా పేర్కొన్నారు.
