టిడిపి అధినేత చంద్రబాబునాయుడు ముప్పై సంవత్సరాలుగా పాతుకుపోయిన కుప్పం నియోజకవర్గంలో పాగా వేయడానికి వైసిపి ప్రయత్నాలు మొదలెట్టింది.
వాస్తవానికి చంద్రబాబు సొంత నియోజకవర్గం చిత్తూరు జిల్లా చంద్రగిరి కాగా 1978 లో కాంగ్రెస్ అభ్యర్థిగా అక్కడ గెలిచి 1983 లో ఓడారు.తదుపరి టిడిపిలో చేరిన చంద్రబాబునాయుడు 1985 ఎన్నికల్లో పోటీ చేయలేదు.1989 నుండి కుప్పంను తన నియోజకవర్గంగా మార్చుకొని అప్రతిహతంగా గెలుస్తూ వస్తున్నారు.అయితే మొన్నటి ఎన్నికల్లో ఆయన మెజారిటీ దారుణంగా పడిపోయింది. ఒకటి రెండు రౌండ్లలో వైసిపి అభ్యర్థి కంటే వెనకబడి కూడా పోయారు.దీన్ని పరిగణనలోకి తీసుకున్న వైసీపీ అధినాయకత్వం వచ్చే ఎన్నికల్లో కుప్పంలోకూడా గెలుపొందాలని టార్గెట్గా పెట్టుకున్నదంటున్నారు. ముఖ్యమంత్రి జగన్మోహన్రెడ్డి ఆదేశాల మేరకు జిల్లా మంత్రి పెద్దిరెడ్డి రామచంద్రారెడ్డి కుప్పం పై ప్రత్యేక శ్రద్ధ పెడుతున్నారట.
ఇందులో భాగంగా కుప్పంలో పెద్ద ఎత్తున అభివృద్ధి కార్యక్రమాలు చేపట్టాలని ప్రభుత్వ సంక్షేమ పథకాలన్నీ ప్రతి ఒక్కరికీ అందేలా చేయాలని ఒక పథకం ప్రకారం వైసిపి ముందుకెళుతోంది.ఇన్నిసార్లు చంద్రబాబును గెలిపించినా, ఆయన దాదాపు పదిహేను సంవత్సరాలు ముఖ్యమంత్రిగా వున్నా కుప్పం నియోజకవర్గం అభివృద్ధిలో బాగా వెనకబడిపోయింది అన్న విషయాన్ని ప్రజల్లోకి తీసుకెళ్లడానికి వైసిపి కృషి చేస్తోంది. దశాబ్దాల తరబడి పెండింగ్లో ఉన్న కుప్పం అండర్ బ్రిడ్జి నిర్మాణాన్ని చేపట్టడానికి ఏర్పాట్లు జరుగుతున్నాయి.కుప్పం నియోజకవర్గం ఎదుర్కొంటున్న సమస్యలపై జగన్ ప్రభుత్వం జిల్లా కలెక్టర్ నుండి ప్రత్యేక నివేదిక కూడా తెప్పించుకుంటున్నారు.వీటినన్నిటి పరిష్కరించడం ద్వారా కుప్పంలో చంద్రబాబుకు స్థానం లేకుండా చేయాలన్నది వైసిపి ప్రభుత్వ లక్ష్యం.
అలాగే కుప్పం నియోజకవర్గంలోని తెలుగు తమ్ముళ్లను వైసీపీ వైపు ఆకర్షించే ప్రయత్నాలు కూడా లోపాయికారిగా జరిగిపోతున్నాయి.ఈ సమాచారం అందడంతో చంద్రబాబు కూడా అప్రమత్తమయ్యారు.కుప్పం నియోజకవర్గానికి హంద్రీ నీవా ప్రాజెక్టు నీరు చేరే విధంగా చర్యలు తీసుకోవాలంటూ వైసిపి ప్రభుత్వంపై ఒత్తిడి తెస్తూ ఒక పాదయాత్ర చేసేలా టిడిపి శ్రేణులను చంద్రబాబు పురిగొల్పారు.ఈ సందర్భంగా చిత్తూరు జిల్లాలో గృహ నిర్బంధాలు ,అరెస్టులు కూడా జరిగాయి.అంతేగాక అవసరమైతే కుప్పం నియోజకవర్గంలో సొంత నిధులతో బడుగు బలహీనవర్గాలకు గృహాలు నిర్మించి ఇచ్చి వారి ఓటు బ్యాంకు చేజారకుండా చూసేందుకు చంద్రబాబు పథకం సిద్ధం చేసుకున్నారని టాక్.మొత్తం మీద చూస్తే కుప్పం నియోజకవర్గంలో కూడా రాజకీయ కుంపటి రాజుకుంది.
