“పార్టీ ఫిరాయిస్తే అనర్హత వేటు వేయాల్సిందే..” అని ప్రతిపక్ష హోదాలో వైఎస్‌ జగన్ మోహన్‌రెడ్డి నినదించిన సంగతి తెలిసిందే. గతంలో చంద్రబాబు ముఖ్యమంత్రిగా ఉన్నప్పుడు.. ఫ్యాన్ గుర్తుపై గెలిచిన 23 మంది ఎమ్మెల్యేలను పసుపుకండువాలు కప్పి పార్టీలోకి చేర్చేసుకున్నారు. అదేంటి అది రాజ్యాంగ విరుద్ధం.. ప్రజాభిప్రాయాన్ని హేళన చేయడం అని చాలా మంది చెప్పినా… “నవ్వి పోదురుగాక నాకేటి…” అన్నట్లుగా ప్రవర్తించారు అన్న విమర్శను బాబు మూటగట్టుకున్నారు. వారిలో నలుగురిని మంత్రులను కూడా చేసేశారు.. ఇది పరాకాష్ట అన్న మాటలు కూడా అప్పట్లో వినిపించాయి. ఆ సంగతులు అలా ఉంటే… తాజాగా కొంతమంది ఎమ్మెల్యేలు వైకాపాలో చేరకపోయినా.. పసుపు కండువాలు మాత్రం తీసి పారేస్తున్నారు! దీనిపై జగన్ ఎలా స్పందించబోతున్నారనేది ఇప్పుడు ఆసక్తికరంగా మారింది.
జనసేన కు చెందిన ఒకే ఒక్క ఎమ్మెల్యే… రాపాక వరప్రసాద్.. ఇప్పుడు ఏ పార్టీలో ఉన్నారు అంటే ఆయనే ఠపీమని చెప్పలేని పరిస్థితి! అంతలా నియోజకవర్గంలోనూ, అసెంబ్లీలోనూ జనసేనకు దూరమైపోయారు… కాదు కాదు వైకాపాకు దగ్గరైపోయారు! ఇక ప్రస్తుతానికి ముగ్గురు… టీడీపీ ఎమ్మెల్యేలు ఆ పార్టీకి అనధికారిక విడాకులిచ్చి జగన్ తో అనధికారిక సంసారం చేస్తున్నారు. వారు టీడీపీలో లేరా అంటే… ఎందుకు లేరు, ఆ పార్టీకి రాజినామా చేయలేదు, ఆ పార్టీ సస్పెండూ చేయలేదు!! మరి వైకాపాలో ఉన్నారా అంటే… లేదు! వారు వైకాపా కండువా కప్పుకోలేదు.. జగన్ అలాంటి పని చేయలేదు!
మరి ఇప్పుడు ఆ టీడీపీ ఎమ్మెల్యేలు ఏపార్టీకి చెందినవారి కింద లెక్క? ఈ విషయంలో, ఇలాంటి రాజకీయాలు చేయడంలో చంద్రబాబు పి.హెచ్.డి. చేశారనే విమర్శ ఉంది కాబట్టి ఆయనే చెప్పాలి! బాబు ఈ విషయంలో మరీ గట్టిగా మాట్లాదామనుకుంటే… గతం అంత దారుణంగా ఉంది… నీవు నేర్పిన విద్యయే కదా అంటారేమో అని భయంగా ఉంది!! అయితే ఈ విషయంలో మాత్రం కొందరు వైకాపా కార్యకర్తలు జగన్ కు ఒక సూచన చేస్తున్నారట!
ఈ ముసుగులో గుద్దులాట్లు, జంపింగ్ రాజకీయాలు వైకాపాకు సూటుకావు, అది పార్టీ సిద్ధాంతానికి పూర్తి వ్యతిరేకం కాబట్టి… వీలైనంత తొందర్లో ఎవరెవరితే టీడీపీ ఎమ్మెల్యేలు ఫ్యాన్ కిందకు రావడానికి ముచ్చటపడుతున్నారో, బాబుతో కలిసి ప్రయాణించడానికి చిరాకు పడుతున్నారో వారితో రాజినామాలు చేయించేసి… ఫ్యాన్ సింబల్ పై గెలిపించేసుకుంటే ఒకపని అయిపోతుంది అని సూచనలు చేస్తున్నారంట. మరి జగన్ వారి మాటలు విని… ఈ టీడీపీ అసంతృప్త నేతలను అధికారికంగా, అఫీషియల్ గా వైకాపా ఎమ్మెల్యేలను చేసుకుంటారా లేదా అనేది వేచి చూడాలి!
