బతక నేర్పి… కడుపు కాల్చి…
కూలి మింగి… కాటి కంపి…
వలస బతుకుకి మెతుకునివ్వని కరోనా….!
ఏమి సాధించావ్…? ఇంకేమి సాధిస్తావ్…?
మూట కట్టే… మైళ్ళు నడిచే…!
పల్లెకనిపోయే… వల్లకాటికెళ్లే…!
కన్నీటికి కరగక కష్టమిచ్చిన కరోనా…
ఏమి సాధించావ్..? ఇంకేమి సాధిస్తావ్…??
కాళ్ళు అరిగే… కళ్ళు తిరిగే…!
గొంతు ఆరే… చెమట కారే…!
పేద కడుపుకి కూడునివ్వని కరోనా…!
ఏమి సాధించావ్…? ఇంకేమి సాధిస్తావ్…?
పండు పండే… పైకమ్మాయే
పైరు నవ్వే… రైతు ఏడ్చే…!
హలుడి కష్టం రోడ్డునేసిన కరోనా…!
ఏమి సాధించావ్…? ఇంకేమి సాధిస్తావ్..?
రోగమొచ్చే… బెరుకులాయే..!
దావఖాన… నిండెనాయే…!
మనిషి బతుకుకి సవాలిసిరిన కరోనా…!
ఏమి సాధించావ్..? ఇంకేమి సాధిస్తావ్…???
కులము… మతమని విర్రవీగే…
సంఘ స్వామని భజన చేసే…
మనిషి అహముని నేల దించిన కరోనా…!
ఏమి సాధించావ్..? ఇంకేమి సాధిస్తావ్…?
– శ్రీనివాస్ మానెం
ఎల్లో జర్నలిజం నడుమ జాతీయ పత్రికా దినోత్సవం…పత్రికా స్వేచ్ఛ ఒక భ్రమ