కన్యాశుల్కం వయస్సు యెంత
ఆమధ్యనే నూరేళ్లు నిండేయి
అప్పుడు ప్రతి ఇంట్లోనూ గంగాభగీరథీ సమానులుగిరీశం భాషలో బ్యూటిఫుల్ యంగ్ విడోస్ ఉండేవారు
వాళ్ళు ఏంచేసేవారు
పుట్టింట్లో అప్పడాలో వొడియాలో అవకాయో పెట్టడం పురుళ్ళు పొయ్యడం అంతే
తీరికవుంటే ఆధ్యాత్మ రామాయణ కీర్తనలు పాడుకోవడం
మోటుగా చెప్పాలంటే వీళ్ళు ఆడవాళ్ళలో అంటరానివాళ్ళు
వాళ్ళు చేసిన పాపం ఏవిటి
అర్థాయూష్ గాడిని కట్టుకోవడం
మన దిక్కుమాలిన శాస్త్రాల ప్రకారం వీళ్ళు జుత్తు ఉంటె మడికి పనికిరారు
మరంచేత జుత్తు తీసేయ్
జుత్తే లేనప్పుడు పువ్వులెందుకు తీసేయ్
మన శాస్త్రాలకి బుద్ధి, బుర్ర, అబుర్రలో ఆలోచన లేవు
మంచి బట్టలు పువ్వులు బొట్టు కాటుక ఉంటె మొగాడిని ఆకర్షిస్తుందిట
సింగినాదం కాదూ
మొగాడికి కావలసింది బొట్టు పువ్వులు వగైరా కావు
కేవలం ఓ ఆడది అంతే
తలలు బోడులైనా తలపులు బోడులా అన్నాడు వేమన
అందుకే ఆరోజుల్లో అప్పుడప్పుడు నూతిలోనో చెరువులోనో ఆడ శవాలు తేలేవి
వంద ఏళ్లలో చాలా మార్పు వచ్చింది
మనం మోడర్న్ అయిపొయేం, శుభం
పైటలు పారేసేం
ప్యాంటు షర్ట్ వేస్తున్నాం
చదువుతున్నాం, ఉద్యోగాలు చేస్తున్నాం
ఐతే ఈ అభివృద్ధి వాపేకాని బలుపు కాదు
మన మనసులు ఇంకా కన్యాశుల్కం దగ్గరే ఉన్నాయి
ఓ చిన్న ఉదాహరణ
ఆమధ్య నేను మా అమ్మాయి ఒక ఫ్రెండ్ ఇంటికి వెళ్ళేం
ఆ ఫ్రెండ్ ఫెమినిస్ట్
ఆవిడ మాఅమ్మాయికి బొట్టు పెట్టింది.
నాకు పెట్టలేదు
ఆ కుంకం తీసుకోని నేనే పెట్టుకుందావఁన్నత ఆవేశం వచ్చిది
కానీ ఆపుకున్నాను
యేవిఁపాపం చేసేనని నాకీ అవమానం
అందుకే నరసింగరావు పోయేక నేను ఏ ఫంక్షన్లకి వెళ్లడం మానేసేను
అతను ఉన్నన్నాళ్ళు నేను శుభశకునం, నా హస్తవాసి మంచిది
అతను పోయిన మరు క్షణం నేను అశుభం
అంటే నాలో ఉన్న శుభాన్ని అతను పట్టుకుపోయేడా
యెంత దరిద్రపు ఆచారం
ఎవరైనా బైటికి వెళ్తున్నప్పుడు పిల్లి ఎదురైతే అశుభం
నల్లపిల్లి ఐతే పర్వాలేదు
నేను ఆ నల్లపిల్లిపాటి చెయ్యకపోయెనా
ఈ అచారాలన్నీ పాటించేది ఆడవాళ్లే
ఈ చదువులు ఉద్యోగాలు కేవలం డబ్బుకోసమే
సంస్కారం ఇవ్వలేదు
అమెరికా, ఆఫ్రికా వెళ్లడం అభివృద్ధి కాదు
విత్ ఆర్ వితౌట్ మొగుడు అందరు ఆడవాళ్లు సమానమే అనుకున్నపుడు అదీ అభివృద్ధి
ఆడదాన్ని అవమానించడం సృష్టికే అవమానం
ముందు సంస్కారం నేర్చుకోండి
బీనా దేవి
ఎల్లో జర్నలిజం నడుమ జాతీయ పత్రికా దినోత్సవం…పత్రికా స్వేచ్ఛ ఒక భ్రమ