ఆర్ధికంగా వెనుకబడిన వర్గాలకు ఉద్యోగాలలో, విద్యావకాశాలలో పది శాతం రిజర్వేషన్లు కల్పిస్తూ నరేంద్ర మోదీ ప్రభుత్వం తెచ్చిన బిల్లును పార్లమెంటు ఉభయ సభలు ఆమోదించాయి. మంచిచెడ్డలు విచారించేందుకు బిల్లును ముందు సెలక్ట్ కమిటీకి పంపాలన్న ప్రతిపక్షాల డిమాండ్‌కు ప్రభుత్వం ససేమిరా అంది. ఇది వివాదాస్పదమైన బిల్లు. గతంలో సుప్రీంకోర్టు ఇచ్చిన ఆదేశాలకు విరుద్ధం. ఆర్ధికపరమైన వెనుకబాటుతనం అనే ఒక్క ప్రాతిపదికతో రిజర్వేషన్లు కల్పించడానికి వీలు లేదనీ, సామాజిక, విద్యా పరమైన వెనుకబాటుతనం కూడా ఉండాలనీ 1992లో ఇందిరా సాహ్నీ కేసులో సుప్రీంకోర్టు స్పష్టం చేసింది.
మోది ప్రభుత్వం తెచ్చిన రాజ్యాంగ సవరణ బిల్లుకు మరో అడ్డంకి కూడా ఉంది. మొత్తం రిజర్వేషన్లు 50 శాతం మించకూడదని గతంలో సుప్రీంకోర్టు స్పష్టం చేసింది. 50 శాతానికి మించి రిజర్వేషన్లు కల్పించడం ఆర్టికల్ 14 ద్వారా సంక్రమిస్తున్న సమానత్వం హక్కును హరిస్తుందని సుప్రీంకోర్టు పేర్కొన్నది.
ఈ రెండు అడ్డంకులనూ అధిగమించి ఇబిసి కోటా అమలులోకి వచ్చేదీ లేనిదీ ఇప్పుడే చెప్పడం కష్టం. మోదీ ప్రభుత్వానికి ఇవన్నీ తెలియక కాదు. వారికి కావాల్సింది రాజకీయ ప్రయోజనం. ఎన్నికలకు కొద్ది నెలల ముందు హఠాత్తుగా ఈ రాజ్యాంగ సవరణ ఎందుకు తలపెట్టిందీ పిల్లలకు కూడా అర్ధమవుతుంది. మోదీ మాత్రం ఎంచక్కా బుకాయిస్తారు. ఈ బిల్లు అంత ముఖ్యమైనదయితే, అంత అవసరమైనదయితే చర్చ సందర్భంగా ఉభయ సభలలో ఆయన ఎందుకు లేరో చెప్పాలి. రాజ్యసభలో బిల్లుపై చర్చ జరుగుతున్నపుడు ఆయన ఆగ్రాలో బహిరంగ సభకు వెళ్లారు. ముఖ్యమైన బిల్లు కన్నా ఆయనకు బహిరంగ సభలు ముఖ్యం.
మోదీకి పార్లమెంటుపై ఎంత గౌరవం ఉన్నదీ దేశ ప్రజలు చాలాకాలంగా చూస్తూనే ఉన్నారు. ఆయన నిజానికి పార్లమెంటులో కూర్చున్నా చర్చ మరింత అర్ధవంతంగా జరిగేందుకు తోడ్పడేది ఏమీ ఉండదు. ముందే చెప్పుకున్నట్లు ఈ రాజ్యాంగ సవరణ బిల్లులో రెండు కీలకమైన అంశాలు ఇమిడి ఉన్నాయి. రెండూ కూడా రాజ్యాంగానికి సంబంధించిన అంశాలు. ఇంత బరువైన విషయంపై ప్రభుత్వం ఆలోచన చేస్తున్నపుడు దానిని దేశప్రజలతో పంచుకోవాల్సిన అవసరం ఉందా లేదా? బిల్లు పార్లమెంటుకు వచ్చే ముందే దానిపై చర్చ జరిగితే ఏమన్నా నష్టం సంభవిస్తుందా? గప్‌చిప్‌గా దొంగచాటుగా బిల్లును తీసుకురావాల్సిన అవసరం ఏముంది? బిల్లును లోక్‌సభలో ప్రవేశపెట్టే వరకూ ఎవరికీ తెలియకుండా అంత జాగ్రత్త తీసుకోవాల్సిన అవసరం ఏమొచ్చింది?
దీనిని బట్టే బిజెపి పెద్దల అంతరంగం ఏమిటో బయటపడుతోంది. ఆగ్రాలో మాట్లాడుతూ, ప్రధాని ఎన్నికల ముందు రాజకీయ ప్రయోజనాలను ఆశించి బిల్లు తెచ్చారన్న వాదనను తోసిపుచ్చారు. దేశంలో ఎప్పుడు చూసినా ఎక్కడో ఒక చోట ఎన్నికలు జరుగూనే ఉన్నాయంటూ, బిల్లు ఎప్పుడు తెచ్చినా ఈ విమర్శ వస్తుందని తనను తాను సమర్ధించుకున్నారు.
నిజమే, దేశంలో ఎప్పుడు చూసినా ఎక్కడో ఒక చోట ఎన్నికలు జరుగుతూనే ఉన్నాయి. అయితే అన్ని ఎన్నికలూ లోక్‌సభ ఎన్నికలు కావు. నరేంద్ర మోదీ ప్రధానిగా కొనసాగేదీ లేనిదీ అన్ని ఎన్నికలూ తేల్చవు. రేపు జరగనున్న లోక్‌సభ ఎన్నికలే తెలుస్తాయి. ఇంత చెబుతున్న మోదీ, తనకు గడచిన నాలుగున్నర ఏళ్లలో ఇబిసి కోటా ఎందుకు గుర్తుకు రాలేదో చెప్పగలరా?
