కథలన్నీ తిరిగి తిరిగి కంచికి చేరినట్టు ఏపీలో వివాదాలన్నీ చుట్టుముట్టీ అన్ని పార్టీలను తాకి చివరికి కోర్టులకు చేరుతాయి. హైకోర్టుల నుంచి సుప్రీంకోర్టుకు చేరుతాయి. సుప్రీం చెప్పిందే ఫైనల్ అవుతుంది. గడచిన ఏడాదిన్నరగా ఏపీలో ఇదే జరుగుతోంది. ఇటివల రాష్ట్రంలో తీవ్ర దుమారం రేపిన టీటీడీ డిక్లరేషన్ కూడా రాజకీయంగా కుదిపేసిన సంగతి తెలిసిందే. వైవీ సుబ్బారెడ్డి ఈ తేనెతుట్టెను కదిపారు. కొడాలి నాని వాఖ్యలు ఈ అంశాన్ని వివాదాస్పదంగా మార్చేశాయి. ప్రస్తుతం ఈ అంశం హైకోర్టులో ఉంది.
తాజాగా హైకోర్టులో ట్విస్ట్ ఏంటంటే..
తిరుమల బ్రహ్మోత్సవాల సందర్భంలో శ్రీవారికి రాష్ట్ర ప్రభుత్వం తరపున పట్టువస్త్రాలు సమర్పించారు సీఎం జగన్మోహన్ రెడ్డి. ఆ సమయంలో ఆయన డిక్లరేషన్ ఇవ్వలేదని హైకోర్టులో పిటిషన్ దాఖలైంది. ఇది దేవాదాయ చట్టం ప్రకారం సెక్షన్ 97, 153 కు విరుద్ధమని గుంటూరు జిల్లా అమరావతి మండలానికి చెందిన ఎ.సుధాకర్ బాబు హైకోర్టులో పిటిషన్ వేశారు. డిక్లరేషన్ అవసరం లేదని మంత్రులు, నిబంధనల అమల్లో విఫలమైన తితిదే ఛైర్మన్, ఈవో తమ విధుల్లో కొనసాగకుండా చూడాలని తన పిటిషన్ లో కోరారు. దీనిపై తగిన నిర్ణయం తీసుకునేలా ఈ పిటిషన్ ను ప్రధాన న్యాయమూర్తి జస్టిస్ జేకే మహేశ్వరికి నివేదించాలని రిజిస్ట్రీని ఆదేశించారు.
అనేక కేసుల్లో ప్రభుత్వానికి ఎదురుదెబ్బలు..
ప్రభుత్వ కార్యాలయాలకు వైసీపీ రంగులు వేయడం దగ్గర నుంచీ మొదలైన కోర్టు కేసులు రాష్ట్ర ప్రభుత్వంపై నిరంతరాయంగా కొనసాగుతున్నాయి. ప్రభుత్వాన్ని ఇరుకున పెట్టేందుకు ప్రభుత్వం తీసుకునే ప్రతి నిర్ణయంపై ప్రతిపక్షాలు, ప్రైవేటు వ్యక్తులు ఎవరొకరు కోర్టుకు వెళ్తున్నారు. వీటిలో అత్యధిక శాతం ప్రభుత్వానికి వ్యతిరేకంగా తీర్పులు వచ్చినవే. ఇప్పుడు మరోసారి టీటీడీ డిక్లరేషన్ అంశంపై సీఎం తీరుపై కోర్టుకు వెళ్లారు. ఇప్పటికే అనేక కేసుల్లో ప్రభుత్వానికి అనుకోని చిక్కులు వస్తున్నా నేపథ్యంలో ఈ విషయంలో ప్రభుత్వానికి ఎటువంటి తీర్పు వస్తుందో చూడాల్సి ఉంది.
