Ys Vivekananda Reddy : వైఎస్ వివేకానంద రెడ్డి Ys Vivekananda Reddy మాజీ మంత్రి వైఎస్ వివేకానంద రెడ్డి వర్ధంతికి ఏపీ సీఎం వైఎస్ జగన్ హాజరు కాలేదు. ఈ విషయం ప్రస్తుతం పార్టీలో చర్చనీయాంశమైంది. పులివెందులలోని వివేకా ఘాట్ వద్ద ఆయనకు నివాళులు అర్పించేందుకు విజయమ్మ, షర్మిల హాజరయ్యారు. వీరితోపాటు వివేకా కుమార్తె సునీత మరికొందరు బంధువులు హాజరై నివాళులు అర్పించారు. వైఎస్ జగన్ ఆయన సతీమణి భారతి కూడా హాజరు కాలేదు. ప్రస్తుతం తెలంగాణలో పార్టీ పెడుతున్న షర్మిల హాజరయ్యారు. జగన్ ఈ కార్యక్రమానికి ఎందుకు హాజరుకాలేదనే వార్త ఇప్పుడు చర్చనీయాంశమైంది.
ఏపీ సీఎం వైఎస్ జగన్ మోహన్ రెడ్డి బాబాయి వైఎస్ వివేకానంద రెడ్డి 2019 మార్చి 15న దారుణ హత్యకు గురైన సంగతి తెలిసిందే. మొదట్లో గుండెపోటుతో చనిపోయారనే వార్తలు వచ్చాయి. కానీ.. ఆయన దారుణ హత్య రాష్ట్రంలో ప్రకంపనలు రేపింది. ఆ సమయంలో ఏపీలో అసెంబ్లీ ఎన్నికల హడావిడి జరుగుతోంది. ఎన్నికలకు సరిగ్గా 28 రోజుల ముందు ఈ హత్య జరిగింది. అనేక మలుపుల తర్వాత ఈ కేసును సీబీఐకి అప్పగించింది హైకోర్టు. వివేకానంద కుమార్తె డాక్టర్ సునీత ఈ విషయంలో న్యాయం కోసం హైకోర్టులో పిటిషన్ దాఖలు చేశారు. కేరళలో సామాజిక కార్యకర్త జోమున్ ని కలవడం సంచలనం రేపింది. తండ్రి మరణంపై ఇప్పటికీ సరైన విచారణ జరగడం లేదనేది సునీత వాదన. ఆమధ్య సీబీఐ కూడా మళ్లీ పులివెందుల వెళ్లి విచారణ ప్రారంభించింది.
అయితే.. సీఎం జగన్ ప్రస్తుతం తీరక లేనంతగా బిజీగా ఉన్నారు. ఇటివలే మున్సిపల్ ఎన్నికల్లో వైసీపీకి తిరుగులేని విజయం లభించింది. మరో రెండు రోజుల్లో మేయర్ల ఎన్నిక ఉంది. ఎవరిని మేయర్ గా ఎన్నుకోవాలనే అంశంపై పార్టీలో జోరుగా చర్చలు జరుగుతున్నాయి. ఆశావాహులు అధిష్టానం వద్ద తమ ప్రయత్నాలు చేసుకుంటున్నారు. సీఎం జగన్ ఈ పనుల్లో కూడా బిజీగా ఉన్నారు. ఈ నేపథ్యంలోనే ఆయన పులివెందుల వెళ్లేందుకు సమయం చిక్కలేదని తెలుస్తోంది. అయితే.. షర్మిల హాజరుకావడంతో మరోసారి వివేకా వర్ధంతికి సీఎం వైఎస్ జగన్ గైర్హాజరీ చర్చనీయాంశమైంది.
