అమరావతి: రాజధాని ప్రాంతంలో టిడిపి అధినేత చంద్రబాబు నాయుడు కాన్వాయ్‌పై జరిగిన దాడిని వదిలిపెట్టే ప్రశ్నలేదనీ, ఈ విషయాన్ని కేంద్రం దృష్టికి తీసుకువెళ్లడంతో పాటు న్యాయస్థానాన్ని ఆశ్రయించి పోరాటం చేస్తామనీ టిడిపి నేత, మాజీ మంత్రి దేవినేని ఉమామహేశ్వరరావు తెలిపారు. శుక్రవారం ఆయన మీడియాతో మాట్లాడుతూ చంద్రబాబు రాజధాని పర్యటనపై వైసిపి రాజకీయం చేసిందని విమర్శించారు.
జడ్ ప్లస్ భద్రతలో ఉన్న నాయకుడు ప్రయాణిస్తున్న బస్సుపై డిఎస్‌పి సమక్షంలోనే బయటి నుండి వచ్చిన వ్యక్తులు దాడి చేస్తుంటే పోలీసులు చోద్యం చూశారని అన్నారు. చంద్రబాబుపై దాడి చేసింది రియల్టర్, రైతు అని చెప్పడం, ఈ దాడిని భావ వ్యక్తీకరణ స్వేచ్చగా అభివర్ణించడం దారుణమని ఉమా పేర్కొన్నారు. నిన్న జరిగిన ఘటనపై సిఎం జగన్ ఎందుకు మాట్లాడరని ప్రశ్నించారు. రాజధానిలో ఒక్క ఇటుక వేయలేదని ఒక మంత్రి, శ్మశానం అని మరో మంత్రి సిగ్గులేకుండా మాట్లాడుతున్నారని ఉమా అన్నారు. 33 వేల ఎకరాలు రైతులు ఇస్తే పందులు, దున్నపోతులు తిరుగుతున్నాయని అవమానిస్తారా అని ప్రశ్నించారు.
పేదవాళ్లకు, ఎమ్మెల్యేలకు, ఎన్‌జివోలకు, ఐఎఎస్‌లకు ఇళ్లు నిర్మిస్తే సున్నాలు వేసి ఇవ్వడానికి జగన్కు చేతులు రావడం లేదని అన్నారు. కొడాలి నానికి బూతుల మంత్రిగా బిరుదు ఇవ్వొచ్చన్నారు. మంత్రుల బూతల భాషపై జగన్ వివరణ ఇవ్వాలన్నారు. ప్రజలు 151 సీట్లు ఇచ్చినా కూడా సిఎం జగన్, మంత్రులకు అభద్రతాభావం ఎందుకని ప్రశ్నించారు. రాజధానిని రక్షించేందుకు డిసెంబర్ అయిదవ తేదీన రాజకీయ పక్షాలు, మేధావులతో రౌండ్ టేబుల్ సమావేశం నిర్వహిస్తున్నట్లు ఉమా తెలిపారు.
