అమరావతి: అటు తెలంగాణ, ఇటు ఎపి రాష్ట్ర ప్రభుత్వాల పట్ల కేంద్రంలోని బిజెపి ప్రభుత్వం అనుసరిస్తున్న వైఖరిని ముఖ్యమంత్రులు ఇద్దరూ తప్పుబట్టి, ఆ వెంటనే వెనక్కు తగ్గడం మడమ తిప్పడం కాదా అని మాజీ మంత్రి, టిడిపి నేత యనమల రామకృష్ణుడు ప్రశ్నించారు.
కేంద్ర ప్రభుత్వంపై ఇద్దరు ముఖ్యమంత్రులు అసంతృప్తిగా ఉన్నారంటూ మీడియాలో ప్రచురితమైన కథనం కల్పితమని ఏపి ముఖ్యమంత్రి కార్యాలయం (సిఎంవో) వివరణ ఇచ్చింది.
దీనిపై యనమల మంగళవారం మీడియాతో మాట్లాడారు.
కేంద్రం ఏపి నిర్ణయాలను వ్యతిరేకిస్తున్నదనీ, తెలంగాణ ప్రాజెక్టులకు సాయం చేయడం లేదనీ ఇద్దరు ముఖ్యమంత్రుల సమావేశంలో చర్చించుకున్న మాట వాస్తవం కాదా అని యనమల ప్రశ్నించారు. ఇద్దరు సిఎంలు కేంద్రంపై ధ్వజమెత్తిన మాట వాస్తవమేనని యనమల అన్నారు. తీరా ఆ విషయాలు బయటకు వచ్చే సరికి నాటకం ఆడుతున్నారని యనమల విమర్శించారు. కెసిఆర్, జగన్, బిజెపి మద్య పొలిటకల్ కోల్డ్ వార్ నడుస్తోందని యనమల ఆరోపించారు.
ముఖ్యమంత్రుల భేటీ తరువాత విలేఖరుల సమావేశం పెట్టి వివరాలు ఎందుకు వెల్లడించలేదని యనమల ప్రశ్నించారు. తొమ్మిది కోట్ల ప్రజలకు సంబంధించిన అంశాన్ని ఎందుకు దాచిపెడుతున్నారని యనమల ప్రశ్నించారు. తెలంగాణకు మేలు చేయడానికా లేక ఆంధ్రప్రదేశ్‌కు అన్యాయం చేయడానికా అని యనమల ఫైర్ అయ్యారు.
