రెండు రోజుల కిందటి వరకు ప్రకాశం జిల్లాలో ఒకటే చర్చ..! ఒకటే రచ్చ…! చీరాల వైసీపీ ఇంచార్జి ఎవరు…? పర్చూరు ఎమ్మెల్యే ఏలూరి సాంబశివరావు పార్టీ మారుతున్నారా లేదా…?? గొట్టిపాటి రవికుమార్ పరిస్థితి ఏంటి.. ?? అంటూ ఒకటే చర్చ. ఇప్పుడు వీటికి నెమ్మదిగా స్పష్టత వస్తుంది. ఒక్కో నియోజకవర్గంలో విషయాలన్నీ నెమ్మదిగా సర్దుకుంటున్నాయి.
చీరాల ఇక ఆమంచి చేతిలో…!
జిల్లాలో అతి ముఖ్యమైన టాపిక్ ఇదే. చీరాల రాజకీయ మార్పులు ఏంటి..? ఇంచార్జి మారతారా? అని!! దీనికి రెండు రోజుల కిందట వైసీపీ మార్కు బ్రేకులు పడ్డాయి. ఇప్పుడు ఇన్చార్జిగా ఉన్న ఆమంచి పగ్గాలు మార్చే అవకాశమే లేదని జగన్ స్పష్టం చేసినట్టు సమాచారం. కొత్తగా వచ్చిన ఎమ్మెల్యే కరణం బలరాం… కేవలం ఎమ్మెల్యే అనే పేరుకే ఆయన అక్కడ ఉంటారని వైసీపీ వర్గాలు ఆమంచికి భరోసా ఇచ్చినట్టు తెలిసింది. ఎన్నికలకు ముందు నుండి పార్టీలో చేరి పార్టీ తరపున గట్టిగా వాయిస్ వినిపిస్తున్న ఆమంచికి కాకుండా.., వ్యక్తీగత అవసరాలకు పార్టీలోకి వచ్చిన కరణం కి ప్రాధాన్యత ఇస్తే పార్టీ శ్రేణులకు అది చెడు సంకేతంగా వెళ్తాదని అంతర్గతంగా చర్చలు జరగడంతో జగన్ ఈ నిర్ణయం తీసుకున్నట్టు తెలిసింది. ఈ మేరకు మొన్న తనను కలిసిన ఆమంచికి జగన్ స్పష్టత ఇచ్చారు, పార్టీ నాయకుడు సజ్జల కూడా ఆమంచితో చాలా సమయం మాట్లాడి స్పష్టత ఇచ్చారు. ఇక బదిలీలు కూడా ఆగినట్టే. కాకపోతే కరణంతో పాటూ పార్టీలోకి వచ్చిన నాయకులు చేస్తున్న అతిని కూడా పార్టీ పరిశీలించాలని ఈ నియోజకవర్గంలో చర్చలు జరుగుతున్నాయి. రెండు వర్గాలు పరస్పరం ఫిర్యాదులు చేసుకుంటున్నాయి.
ఏలూరి ప్రస్తుతం లేనట్టే…!
ఇక పర్చూరు ఎమ్మెల్యే ఏలూరి సాంబశివరావు పార్టీ మార్పు వ్యవహారం. ఇది కూడా వారం రోజుల నుండి బాగా నోళ్ళల్లో నలుగుతుంది. ప్రస్తుతానికి అయితే ఆగినట్టు తెలుస్తుంది. సీఎం జగన్ నుండి సానుకూలత లేదు అని మొదటి నుండీ చెప్పుకుంటున్నాం. జిల్లాలో మంత్రి బాలినేని , ఇతర సీనియర్ నాయకులు ఎమ్మెల్యే చేరిక విషయంలో కొంత కీలకంగా వ్యవహరించినప్పటికీ… సీఎం జగన్ మాత్రం ఎమ్మెల్యేల చేరికపై అంతగా ఆసక్తి చూపలేదని తెలిసింది. అయితే ఎమ్మెల్యే తరపున వచ్చిన ప్రతిపాదనలు, కొన్ని ఆకాంక్షల విషయంలో వైసీపీ నుండి స్పష్టత లేకపోవడంతో ఆగింది అని సమాచారం. సో… కారణాలు ఏమైనప్పటికీ ఈ విషయం కూడా బ్రేకులు పడింది. మరోవైపు అద్దంకి ఎమ్మెల్యే గొట్టిపాటి రవికుమార్ కూడా ఇప్పట్లో పార్టీ మరే అవకాశం లేదని అంటున్నారు. ఈ ఇద్దరు ఎమ్మెల్యేలకు చంద్రబాబు వ్యక్తిగతంగా భరోసా ఇవ్వడం…, ఇటు వైసీపీ నుండి కూడా అంత సానుకూలత లేకపోవడంతో ఆగినట్టేనని జిల్లాలో చర్చ జరుగుతుంది.
