హైదరాబాదు, మార్చి 13: కాంగ్రెస్ పార్టీకి చెందిన మాజీ మంత్రి, మల్లేశ్వరం ఎమ్మెల్యే సబితా ఇంద్రారెడ్డి టిఆర్ఎస్‌లో చేరడం ఇక లాంఛనప్రాయమే. ఆమె బుధవారం టిఆర్ఎస్ అధినేత, ముఖ్యమంత్రి కె చంద్రశేఖరరావుతో భేటీ అయ్యారు.
కొద్ది రోజులుగా కాంగ్రెస్ పార్టీపై సబిత అసంతృప్తితో ఉన్నారు. దానితో టిఆర్ఎస్ పార్టీలో చేరేందుకు ఆమె మొగ్గు చూపారు. మూడు రోజుల క్రితం ఆమె ఎంఐఎం ఎంపి అసదుద్దీన్ ఒవైసి సమక్షంలో టిఆర్ఎస్ వర్కింగ్ ప్రెసిడెంట్ కెటిఆర్‌తో సమావేశమయ్యారు. టిఆర్ఎస్‌లో చేరిక విషయంపై చర్చించారు.
దానితో రంగంలోకి దిగిన కాంగ్రెస్ ఆమెను బుజ్జగించేందుకు ప్రయత్నించింది. ఫలితం లేకపోవడంతో అగ్రనాయకత్వం కూడా జోక్యం చేసుకుంది. సోనియా గాంధీ నేరుగా సబితతో మాట్లాడారు. కాస్త మెత్తబడిన సబిత మళ్లీ అసదుద్దీన్ కలిసిన తర్వాత ట్ఆర్ఎస్‌లో చేరేందుకే నిర్ణయించుకున్నారు. బుధవారం సాయంత్రం తన ముగ్గురు కుమారులతో ప్రగతిభవన్‌కు చేరుకుని కెసిఆర్‌తో భేటీ అయ్యారు.
