Tdp-Cpi: టీడీపీ-సీపీఐ Tdp-Cpi సీపీఐ పార్టీ మళ్లీ తెలుగుదేశంతో పొత్తు పెట్టుకుంది. అయితే.. 2024 ఎన్నికల లక్ష్యంగా ఈ పొత్తు కాదు. ప్రస్తుతం ఏపీలో జరుగుతున్న మున్సిపల్ ఎన్నికల సందర్భంగా టీడీపీతో పొత్తు పెట్టుకున్నట్టు సీపీఐ జాతీయ కార్యదర్శి నారాయణ తెలిపారు. విజయవాడ మహానగరం అభివృద్ధి కోసమే ఈ పొత్తు అని అన్నారు. ఈ రెండు పార్టీలు కలసి పొత్తు పెట్టుకోవడం ఇదేం కొత్త కాదు. గతంలో కూడా ఈ రెండు పార్టీలు కలిసి పొత్తు పెట్టుకుని ఎన్నికలకు వెళ్లాయి. అయితే.. టీడీపీ-సీపీఐ పొత్తు ఏమేర లాభిస్తుందనేది చూడాల్సి ఉంది.
ఎన్నికల సమయంలో ఈ రెండు పార్టీల మధ్య ఉండే పొత్తు తర్వాత కొనసాగలేదు. పైగా.. అధికారంలో లేని టీడీపీ ఇప్పుడు పోరాడుతోంది. అధికారంలో ఉన్న పార్టీకి ఎప్పుడూ వ్యతిరేకంగా ఉండే సీపీఐ ఇప్పుడూ అదే చేస్తోంది. గతంలో టీడీపీ అధికారంలో ఉన్నప్పుడు ఆ పార్టీకి వ్యతిరేకంగానే ఉంది. జనసేనతో పొత్తు పెట్టుకుని 2019లో ఎన్నికలకు వెళ్లింది. ఇలా ప్రజా సమస్యలపై నిత్యం పోరాడే సీపీఐ ప్రతి ఎన్నికల సమయంలో పొత్తులుకు వెళ్లడం కొత్తేమీ కాదు. కాకపోతే మిత్రుత్వం – శత్రుత్వం – మిత్రుత్వం అనే కాన్పెప్ట్ చుట్టూనే తిరిగే రాజకీయాల్లో పార్టీలకు ఇది తప్పనిసరి అయింది. బీజేపీ, వైసీపీకి వ్యతిరేకంగానే ఇప్పుడు టీడీపీతో కలిసి సీపీఐ ముందుకువెళ్తోంది.
గతంలో చంద్రబాబు అధికారంలో ఉన్నప్పుడు ఎప్పుడూ ఇతర పార్టీల అభిప్రాయాలపై కన్నెత్తి చూసింది లేదు. 2014లో కలిసి పోటీ చేసిన జనసేన, బీజేపీలతో కూడా తర్వాతి కాలంలో విభేధించారు. ఇందుకు సీపీఐ కూడా మినహాయింపు ఏమీ కాదు. ఇప్పుడు టీడీపీ పోరాడుతోంది. పంచాయతీ ఎన్నికల్లో పార్టీ గుర్తులతో పోటీ లేదు కాబట్టి ఎవరి లెక్కలు వారు చెప్పుకున్నారు. ఇప్పుడు మున్సిపల్ ఎన్నికలు జరుగబోతున్నాయి. పార్టీ గుర్తులపై జరుగుతున్నాయి కాబట్టి.. టీడీపీ కూడా సీపీఐతో కలిసి జత కట్టింది. ఇదే పొత్తును 2024లో కూడా టీడీపీ-సీపీఐ కంటిన్యూ చేస్తుందా అనేది సందేహమే. ప్రస్తుత మునిసిపల్ ఎలక్షన్లే వారి టార్గెట్. మరి ఏమేర ఫలితాలు రాబడతాయో ఈ రెండు పార్టీలు చూడాలి.
