(న్యూస్ ఆర్బిట్ డెస్క్)
అమరావతి: కృష్ణా, గుంటూరు ప్రజాప్రతినిధులు రాజధాని కావాలో లేదో చెప్పాలని టిడిపి విజయవాడ పార్లమెంట్ సభ్యుడు కేశినేని నాని కోరారు. ఆదివారంలో విజయవాడలో ఆయన మీడియాతో మాట్లాడుతూ అమరావతి రాజధాని కోసం కులమతాలకు అతీతంగా పోరాడుతున్నారని చెప్పారు. అమరావతిలో అన్ని సౌకర్యాలు కల్పిస్తే రాజధాని మార్చడం ఏమిటని ప్రశ్నించారు. ఈ ప్రాంతానికి చెందిన ప్రజా ప్రతినిధులు రాజధానికి ద్రోహం చేసి చరిత్ర హీనులుగా మారవద్దని కేశినేని సూచించారు. సిఎం జగన్ మూడు రాజధానుల నిర్ణయంపై సొంత పార్టీ ఎమ్మెల్యేలే అసంతృప్తిగా ఉన్నారని ఆయన అన్నారు. రాష్ట్రంలోని అన్ని ప్రాంతాలకు అమరావతి అనువైన ప్రాంతమని కేశినేని పేర్కొన్నారు. చంద్రబాబుపై, ఒక కులం మీద కక్షతో ఇలా చేయడం సరికాదని హితవుపలికారు. ప్రాణాలైనా అర్పించి రాజధానిని కాపాడుకుంటామని కేశినేని స్పష్టం చేశారు.
