Gaali Sampath Review : యువ కథానాయకుడు శ్రీ విష్ణు, రాజేంద్ర ప్రసాద్ ప్రముఖ పాత్రలుగా సక్సెస్ దర్శకుడు అనిల్ రావిపూడి స్క్రిప్ట్ అందించిన చిత్రం ‘గాలి సంపత్’. అనీష్ కృష్ణ దర్శకత్వం వహించిన ఈ చిత్రం ఈరోజు ప్రేక్షకుల ముందుకు వచ్చింది. అచ్చు ఈ సినిమాకి సంగీత సారధ్యం వహించాడు. అనిల్ రావిపూడి స్క్రిప్ట్ అందించడమే కాకుండా దర్శకత్వ పర్యవేక్షకుడిగా కూడా వ్యవహరించాడు. సస్పెన్స్ డ్రామాగా తెరకెక్కిన ఈ చిత్రం ఎలా ఉందో చూద్దాం…
పాజిటివ్ లు
- ఈ సినిమాలో రాజేంద్ర ప్రసాద్ నటన గురించి అతిముఖ్యంగా చెప్పుకోవాలి. ‘నటకిరీటి‘ అన్న తన బిరుదు తగ్గట్లు రాజేంద్రప్రసాద్ సినిమాలో అద్భుతమైన నటన కనబరిచారు.
- అచ్చు ఇచ్చిన బ్యాక్ గ్రౌండ్ మ్యూజిక్ కూడా చాలా బాగుంది. కామెడీ సీన్లకు మంచి క్రేజీ మ్యూజిక్ ఇచ్చిన అచ్చు…. ఎమోషన్స్, థ్రిల్లింగ్ ఎలిమెంట్స్ ఉన్న సీన్లలో అయితే తన టాలెంట్ మొత్తం బయట పెట్టేసాడు.
- కామెడీ విషయానికి వస్తే…. సత్య ప్రదర్శన ప్రేక్షకులను బాగా ఆకట్టుకుంటుంది. ఈ మధ్య మంచి టైమింగ్ తో స్టార్ కమెడియన్ గా ఎదుగుతున్న సత్య ఈ సినిమా ద్వారా మరిన్ని ఆఫర్లు అందుకుంటాడు. రాజేంద్రప్రసాద్ తో అతని కామెడీ సన్నివేశాలు థియేటర్లో నవ్వుల తెప్పిస్తాయి.
- సినిమా మొదటి అర్ధ భాగం లో ఉన్న స్ట్రాంగ్ స్టోరీ లైన్ ప్రధాన బలం. బాగా రసవత్తరంగా తెరకెక్కించిన ఫస్ట్ హాఫ్ వల్ల ప్రేక్షకులకు సెకండాఫ్ పైన మంచి ఆసక్తి వస్తుంది.
నెగటివ్ లు
- ఈ సినిమాకు ఫ్లాష్బ్యాక్ ఎపిసోడ్ ఒక రకంగా అవసరం లేదనే చెప్పాలి. అయితే ఆ ఉన్న ఫ్లాష్బ్యాక్ కూడా పెద్దగా కథకు ఉపయోగపడలేదు. ఉన్న రెండు గంటల సినిమా లోనే ఈ ఎపిసోడ్ ప్రేక్షకులకు బోర్ కొట్టించేస్తుంది.
- స్క్రీన్ ప్లే కూడా చాలా రొటీన్ గా ఉంటుంది. సస్పెన్స్ థ్రిల్లర్ డ్రామా నేపథ్యంలో జరిగే కథకు అవసరమైన స్క్రీన్ప్లే ను అనిల్ రావిపూడి సమకూర్చలేకపోయారు.
- సినిమాకి ముఖ్యమైన ఎమోషనల్ కనెక్టివిటీ కూడా ప్రేక్షకులకి లభించలేదు. కథలో బలం ఉన్నప్పటికీ రాజేంద్రప్రసాద్, శ్రీ విష్ణు మధ్య జరిగే ఎమోషనల్ సీన్లు మరింత మెరుగ్గా ఉండాల్సింది.
- చిత్రం రెండవ అర్ధ భాగం మొత్తం చప్పగా సాగుతుంది. తన స్ట్రాంగ్ జోనర్ అయిన కామెడీ ని పక్కన పెట్టి అనిల్ రావిపూడి తొలిసారి సస్పెన్స్ డ్రామా వైపు మళ్లితే అది కాస్త పూర్తిగా బెడిసికొట్టింది. రెండవ అర్ధ భాగం మొత్తం థియేటర్లలో జనాలు నీరసపడిపోతారు.
Gaali Sampath Review – కథ :
సంపత్ (రాజేంద్రప్రసాద్) కు గతంలో జరిగిన ఒక ఘోరమైన ఆక్సిడెంట్ కారణంగా అతని స్వరపేటిక దెబ్బతింటుంది. ఇక తను మాట్లాడేటప్పుడు ‘ఫ… ఫ..’ అనే సౌండ్ తప్ప మాటలు బయటికి రావు. అందుకే అప్పటి నుండి అతనికి ఊరి వారంతా ‘గాలి సంపత్‘ అని పేరు పెట్టారు. తన వైకల్యాన్ని కూడా పట్టించుకోకుండా సంపత్ ఎప్పటికైనా ఒక మంచి నటుడు కావాలి అనే తన కల కోసం ప్రయత్నాలు చేస్తూ ఉంటాడు. అతను చేసే విశ్వప్రయత్నాల వల్ల అతడి కొడుకు సూరి (శ్రీ విష్ణు) చిక్కుల్లో పడతాడు. చివరికి సంపత్ చేసిన తప్పు వల్ల అతను ప్రాణంగా ప్రేమించిన సిరితో ప్రేమ వివాహం కూడా రద్దు అవుతుంది. దీంతో తండ్రి మీద కోపంతో అతనిని వదిలేస్తాడు. ఇటువంటి సమయంలో ఒకరోజు సంపత్ తన ఇంటి వెనకాల ఉండే లోతైన గోతిలో పడి పోతాడు. అతను మాట్లాడితే కేవలం గాలి బయటకు వస్తుంది కాబట్టి సహాయం అడగలేని పరిస్థితి. ఇంతలోనే వర్షం. మరి సంపత్ ఆ గోతి నుండి బయటపడగలడా… లేదా? అనేదే మిగిలిన కథాంశం.
విశ్లేషణ :
కమర్షియల్ సినిమాలు తీయడంలో సిద్ధహస్తుడైన అనిల్ రావిపూడి… తొలిసారి సస్పెన్స్ థ్రిల్లర్ ను ట్రై చేశాడు. కాన్సెప్టు బలమైంది అయినప్పటికీ ఈ సినిమాలో రావిపూడి థ్రిల్లర్ జోనర్ లో అనుభవలేమి వల్ల బాగా ఇబ్బంది పడినట్లు తెలుస్తోంది. రాజేంద్రప్రసాద్ అద్భుతమైన నటన కనబరిచినప్పటికీ నరేషన్ విషయంలో దర్శకుడు తడబడ్డాడు. రెండవ అర్ధ భాగంలో ఆసక్తికర స్క్రీన్ ప్లే రాయడం లో కూడా ఎన్నో లోపాలు ఉన్నాయి. క్యారెక్టర్లకు, ఎమోషన్స్ కు ప్రేక్షకులు అసలు కనెక్ట్ కాలేరు. మంచి కాన్సెప్ట్ ఉన్నప్పటికీ దానిని ఇంట్రెస్టింగ్ గా తెరకెక్కించే విషయంలో దర్శకులు భారీగా విఫలమయ్యారు.