మాస్ మహారాజా రవితేజ, శృతి హాసన్ జంటగా నటించిన చిత్రం ‘క్రాక్’ నేడు ప్రేక్షకుల ముందుకు వచ్చేసింది. గోపీచంద్ మలినేని దర్శకత్వం వహించిన ఈ చిత్రాన్ని సరస్వతి ఫిలిం డివిజన్ బ్యానర్ పై వి మధు చిత్రాన్ని నిర్మించారు. సంక్రాంతి పోటీలో మొదటిగా రిలీజ్ అవుతున్న ఈ చిత్రానికి కి ఎస్.ఎస్ తమన్ సంగీత సారధ్యం వహించాడు. చాలా రోజుల తర్వాత మంచి పవర్ ఫుల్ పోలీస్ రోల్ లో కనిపించిన రవితేజ బ్లాక్ బస్టర్ సొంతం చేసుకున్నాడో లేదో చూద్దాం…
కథ
పవర్ ఫుల్ పోలీస్ ఆఫీసర్ పోతురాజు వీరశంకర్ (రవితేజ) విచ్చలవిడిగా అక్రమాలు, దోపిడీలు జరుగుతున్న ఏరియా లో పోస్టింగ్ కు వస్తాడు. మెయిన్ విలన్ సముద్రఖని చేసే ప్రతి పనికి అడ్డుపడుతూ అతనికి ప్రధాన టార్గెట్ అవుతాడు. ఇక వీరశంకర్ దూకుడుకి అడ్డుకట్ట వేయడానికి విలన్ ఎటువంటి ఎత్తులు వేస్తాడు… వీర శంకర్ భార్య, అతని కుటుంబం ఎలాంటి ఇబ్బందులు ఎదుర్కొంటుంది…. వాటన్నింటిని రవితేజ ఎలా అధిగమిస్తాడు అన్నదే మిగిలిన కథాంశం. ఇక ఎప్పటిలాగే దందాలు, రౌడీలు, మాస్ మసాలా, మాఫియా, వార్నింగ్ లు, ఫైట్లతో పక్కా కమర్షియల్ తెలుగు చిత్రంగా ‘క్రాక్’ తెరకెక్కింది.
ప్లస్ లు
రవితేజ పవర్ఫుల్ పర్ఫార్మెన్స్
విలన్ రోల్
మాస్ సీన్లు, వార్నింగ్ లు
అద్దిరిపోయిన సెకండ్ హాఫ్
సినిమాటోగ్రఫీ
మైనస్ లు
స్క్రీన్ ప్లే
శ్రుతి హాసన్
రొటీన్ కథాంశం
రిపీటెడ్ ఎలివేషన్ లు
విశ్లేషణ
చాలా రోజుల తర్వాత పక్కా కమర్షియల్ మాస్ ఎంటర్టైనర్ తో వచ్చిన రవితేజ పోలీస్ ఆఫీసర్ గా విక్రమార్కుడు లెవెల్ పర్ఫార్మెన్స్ ఇచ్చేశాడు. ఇక వరలక్ష్మి శరత్ కుమార్, సముద్రఖని లాంటి బలమైన నటీనటులకు రవితేజకు మధ్య జరిగే సన్నివేశాలు మాస్ ప్రేక్షకులను విపరీతంగా ఆకట్టుకుంటాయి అనడంలో ఎలాంటి సందేహం లేదు. సినిమా మొదటి 15 నిమిషాల నుండి ఊపందుకుంటుంది. ఇంటర్వెల్ వరకు అలాగే కొనసాగుతుంది. సెకండ్ హాఫ్ డల్ అవుతుంది అనిపించే లోపలే మళ్లీ దర్శకుడు గోపీచంద్ ఎలాంటి తడబాటు లేకుండా ఫాన్స్ కు కావలసిన ఎలిమెంట్స్ తో నింపేసాడు. అయితే కొది చోట్ల పాత సినిమాల్లోని ఎలివేషన్ సీన్లు రిపీట్ అయ్యాయి అనిపిస్తుంది. పైగా కథాంశం కూడా కొత్తదేమీ కాదు. అయితే నటీనటుల పవర్ ఫుల్ పర్ఫార్మెన్స్ వల్ల ఇవన్నీ మసకబారిపోతాయి. వరలక్ష్మి శరత్ కుమార్, సముద్రఖని నటన అయితే సినిమా కే హైలైట్ అని చెప్పాలి. కథలోని క్యారెక్టర్ల మధ్య పోటీతత్వం, మాస్ ఎలిమెంట్స్, కావలసినంత ఎనర్జీ ఈ చిత్రాన్ని తీసుకు వెళ్లి మరో లెవెల్ లో కూర్చోబెట్టాయి. స్క్రీన్ ప్లే బాగా పరిగెత్తినట్టు అనిపిస్తుంది కానీ సగటు ప్రేక్షకుడికి మాత్రం ఈ చిత్రం మంచి ఎక్స్పీరియన్స్, రవితేజకు అత్యవసర హిట్.
చివరి మాట : క్రాక్ – థియేటర్స్ దగ్గర రాక్
