‘మ‌న్మ‌థుడు 2’ రివ్యూ

చిత్రం: మ‌న్మ‌థుడు 2
వ్య‌వ‌థి: 155.10 నిమిషాలు
నిర్మాణ సంస్థ‌లు: మ‌నం ఎంట‌ర్‌ప్రైజెస్‌, ఆనంది ఆర్ట్ క్రియేష‌న్స్‌, వయాకామ్ 18 స్టూడియోస్‌
న‌టీన‌టులు: నాగార్జున అక్కినేని, ర‌కుల్ ప్రీత్ సింగ్‌, ల‌క్ష్మి, వెన్నెల‌కిషోర్‌, రావు ర‌మేష్‌, ఝాన్సీ, దేవ‌ద‌ర్శిని త‌దిత‌రులు
డైలాగ్స్‌:  కిట్టు విస్సా ప్ర‌గ‌డ‌, రాహుల్ ర‌వీంద్ర‌న్‌
ఎడిట‌ర్స్‌:  ఛోటా కె.ప్ర‌సాద్‌, బి.నాగేశ్వ‌ర రెడ్డి
స్క్రీన్‌ప్లే:  రాహుల్ ర‌వీంద్ర‌న్, స‌త్యానంద్‌
ప్రొడ‌క్ష‌న్ డిజైన‌ర్స్‌:  ఎస్‌.రామ‌కృష్ణ‌, మౌనిక‌
మ్యూజిక్:  చైత‌న్య  భ‌రద్వాజ్‌
సినిమాటోగ్ర‌ఫీ:  ఎం.సుకుమార్‌
నిర్మాత‌లు:  నాగార్జున అక్కినేని, పి.కిర‌ణ్‌
ద‌ర్శ‌క‌త్వం:  రాహుల్ ర‌వీంద్ర‌న్‌

స‌మీక్ష‌
కొడుకులు హీరోలుగా ఎదిగిన స‌మ‌యంలో తండ్రుల‌కు మంచి క‌థ‌లు దొర‌క‌డం క‌ష్ట‌మ‌వుతుంది. అలాంటి ఇబ్బందే నాగార్జున‌కు కూడా ఉంది. ఒక‌ర‌కంగా రొమాంటిక్ కామెడీ చిత్రాల‌కు దూర‌మ‌వుదామ‌ని ఆయ‌న అనుకుంటున్న స‌మ‌యంలో ఆయ‌న‌కు దొరికిన స‌బ్జెక్ట్ `మ‌న్మ‌థుడు2`. నాగార్జున కెరీర్‌లో `మ‌న్మ‌థుడు` చిత్రానికి చాలా ప్ర‌త్యేక‌త ఉంది. విజ‌య‌భాస్క‌ర్ ద‌ర్శ‌క‌త్వంతో పాటు త్రివిక్ర‌మ్ డైలాగులుకూడా ఆ సినిమా అత్యంత ప్ల‌స్ అయ్యాయి. ఆ సినిమా విడుద‌లైన ఇన్నేళ్ల త‌ర్వాత మ‌ళ్లీ నాగార్జున అదే పేరుతో కాక‌పోతే దానికి 2 అనే సంఖ్య‌ను త‌గిలించి రూపొందించిన చిత్రం `మ‌న్మ‌థుడు2`. `చి.ల.సౌ` అనే చిన్న చిత్రానికి ద‌ర్శ‌క‌త్వం వ‌హించిన రాహుల్ ర‌వీంద్ర‌న్‌ ఈ సినిమాకు ద‌ర్శ‌కుడిని చేశారు. ఫ్రెంచ్ సినిమా ఆధారంగా ఈ సినిమాను తెర‌కెక్కించారు. త‌న తొలి ప్రేమ దూర‌మైంద‌న్న కోపంతో పెళ్లి వ‌ద్ద‌నుకునే ఓ అబ్బాయి. అత‌నికి వ‌య‌సు మీద ప‌డి మ‌ధ్య వ‌య‌స్సులోకి వెళ్తాడు. అత‌నికి ముగ్గురు అక్క‌జెల్లెళ్లు. త‌ల్లి క‌టుంబ పెద్ద‌. తల్లికి రోజురోజుకీ అనారోగ్యం ముదురుతున్న సంగ‌తి తెలుస్తూనే ఉంటుంది. ఎలాగోలా కొడుకు పెళ్లి చేయాల‌ని క‌రాఖండిగా చెప్పేస్తుంది. ఆమె గురించి ఆలోచిస్తూ వెళ్తున్న కొడుక్కి ఒకమ్మాయి త‌న‌కు న‌చ్చ‌ని చ‌దువు చ‌ద‌వ‌కుండా తండ్రి ముందు నాటకం ఆడి త‌ప్పించుకోవ‌డం క‌నిపిస్తుంది. తాను కూడా అలాంటి నాట‌కం ఆడి, ఇంట్లో వాళ్ల ద‌గ్గ‌ర పెళ్లి ప్ర‌స్తావ‌న లేకుండా చేసుకోవాల‌నుకుంటాడు. అంత వ‌ర‌కూ బాగానే ఉంది కానీ, కుటుంబ‌స‌భ్యుల‌కోసం నాట‌కాలు ఆడ‌టం, ప్రేయ‌సిగా మ‌రో అమ్మాయిని తీసుకొచ్చి ప‌రిచ‌యం చేయ‌డం మ‌న‌కు కొత్తేం కాదు. ఈ సినిమాలో జ‌రిగింది అదే. ప్రేయ‌సిగా న‌టించడానికి ఒప్పుకున్న అమ్మాయికి బోలెడంత ఫ్లాష్‌బ్యాక్ ఉంటుంది. అయినా క‌లిసి ఒక‌రికొరు బ‌తికే క్ర‌మంలో అవ‌న్నీ తెలుస్తాయి. అంత వ‌ర‌కూ ఓకే అనుకుంటే చిరాకు క‌లిగించే అంశాలు సినిమాలో చాలానే ఉన్నాయి. హీరోకున్న ఓసీడీ చూస్తే న‌వ్వు రావాల్సింది పోయి చిరాకు క‌లుగుతుంది. పోర్చుగ‌ల్‌లో తెలుగువారు మాట్లాడే కాస్త స్ప‌ష్ట‌మైన తెలుగు భాష‌ను వీళ్లు ఉప‌యోగించిన తీరు చూస్తే ప్రేక్ష‌కులు కొత్త‌ద‌నం ఫీల్ కావాల్సిన చోట విసుగ్గా భావిస్తారు. నాగార్జున అందం మీద అన్ని డైలాగులు వేయ‌డం బాగోలేదు. ర‌కుల్ – ఝాన్సీ మ‌ధ్య లిప్‌లాక్ స‌న్నివేశం నిజానికి సినిమాకు అంత అవ‌స‌రం లేదు. కానీ ఎందుకుపెట్టారో, ఏం చెప్ప‌ద‌ల‌చుకున్నారో అర్థం కాదు. ఏదైమైనా `చి.ల‌.సౌ` తీసిన రాహుల్ రవీంద్ర‌న్ తెర‌కెక్కించిన చిత్రమిది అని అంటే న‌మ్మ‌బుద్ధి పుట్ట‌దు. డ‌బుల్ మీనింగ్ డైలాగును ఎంజాయ్ చేసేవాళ్లు చేసినా, కొంద‌రికి వెగ‌టు క‌లిగిస్తాయి. ఈ సినిమా ప్రేక్ష‌కుల‌ను ఎంత మెప్పిస్తుందో చూడాలి మ‌రి.

రేటింగ్‌: 2/5
బాట‌మ్ లైన్‌: `మ‌న్మ‌థుడు`కి… దీనికీ పొంత‌నే లేదు!