Breaking: హైదరాబాద్ శివారు అబ్దూల్లాపూర్ మెట్ లో ఉద్రిక్త పరిస్థితులు చోటుచేసుకున్నాయి. అబ్దుల్లాపూర్ మెట్ లో అక్రమ నిర్మాణాల కూల్చివేత చర్యలను రెవెన్యూ, పోలీస్ అధికారులు చేపట్టారు. జెసిబీతో అక్రమ నిర్మాణాలను కూల్చివేస్తున్నారు. ఈ క్రమంలో రెవెన్యూ అధికారులను స్థానికులు అడ్డుకున్నారు. పెద్ద ఎత్తున పోలీసు బలగాలతో అక్కడకు చేరుకున్న రెవెన్యూ అధికారులు అక్రమ నిర్మాణాలను కూల్చివేస్తుండగా, స్థానికులు అడ్డుకుని ఆందోళనకు దిగారు. తహశీల్దార్ ను మహిళలు చుట్టుముట్టారు. అధికారులతో స్థానికులు వాగ్వివాదానికి దిగారు.
స్థానిక నేతలకు డబ్బులు చెల్లించే తాము నిర్మాణాలు చేసుకున్నాామని, నిర్మాణాలు తొలగించరని తమకు హామీ ఇచ్చారని చెబుతున్నారు. నిర్మాణాలు తొలగింపు నిలుపుదల చేయాలని డిమాండ్ చేస్తూ స్థానికులు జాతీయ రహదారిపై భైటాయించి నిరసన తెలియజేస్తున్నారు. దీంతో అక్కడ ఉద్రిక్త పరిస్థితులు నెలకొన్నాయి. హైదరాబాద్ శివారు ప్రాంతాల్లో పెద్ద ఎత్తున జరుగుతున్న అక్రమ నిర్మాణాలపై రెవెన్యూ అధికారులు దృష్టి పెట్టారు. గత కొద్ది రోజులుగా అక్రమ నిర్మాణాల తొలగింపుపై స్పెషల్ డ్రైవ్ ను అధికారులు నిర్వహిస్తున్నారు. ఈ క్రమంలోనే ఆదివారం అబ్దుల్లాపుర్ మెట్ లో అక్రమ నిర్మాణాల తొలగింపునకు చర్యలు చేపట్టారు.
