సికింద్రాబాద్ రైల్వే స్టేషన్ లోని ప్రయాణీకుల్లో ఒక్క సారిగా అలజడి రేగింది. బళ్లారి ఎక్స్ ప్రెస్ రైలు సికింద్రాబాద్ రైల్వే స్టేషన్ లో ఆగి ఉన్న సమయంలో పెద్ద ఎత్తున ఆర్పీఎఫ్, జీఆర్పీ పోలీసులు డాగ్ స్క్వాడ్ తో చేరుకుని విస్తృతంగా తనిఖీలు చేపట్టారు. ఒక్క సారిగా పోలీసులు రైల్వే స్టేషన్ కు చేరుకుని రైలులో అనువణువు తనిఖీలు చేస్తుండటంతో ప్రయాణీకులు ఏమి జరుగుతుందో అర్ధం కాక ఆందోళనకు గురైయ్యారు. ఆ తర్వాత విషయం తెలిసి అందరూ ఊపిరిపీల్చుకున్నారు. విషయం ఏమిటంటే.. ఓ గుర్తు తెలియని వ్యక్తి పోలీస్ కంట్రోల్ రూమ్ కు ఫోన్ చేసి బళ్లారి ఎక్స్ ప్రెస్ లో బాంబు పెట్టామని ఫోన్ చేశాడు. దీంతో ఆర్పీఎఫ్, జీఆర్పీ పోలీసులు డాగ్ స్క్వాడ్ తో రైలులో తనిఖీలు చేశారు. అయితే ఎక్కడా బాంబు ఆచూకీ లేకపోవడంతో అది కేవలం బెదిరింపు కాలేనని తేలడంతో పోలీసులు ఊపిరిపీల్చుకున్నారు. బాంబు ఉందని కాల్ చేసిన వ్యక్తి కోసం పోలీసులు గాలిస్తున్నారు. ఫోన్ చేసిన వ్యక్తి ఎవరు అనేది ఇంకా తెలియరాలేదు.
రెండు రోజుల క్రితం శంషాబాద్ విమానాశ్రయంలో కూడా చెన్నై వెళ్లే విమానంలో బాంబు పెట్టినట్లు ఓ వ్యక్తి ఫోన్ చేయడం, ఆ తర్వాత అధికారులు తనిఖీ చేయగా అది ఫేక్ కాల్ అని తేలిపోయింది. విమానాశ్రయానికి ఆలస్యంగా వచ్చిన ఓ ప్రయాణీకుడిని లోపలకు అనుమతించకపోవడంతో ఆ ఫ్లైట్ లో బాంబు ఉందంటూ బెదిరింపు కాల్ చేసినట్లు గుర్తించారు. వెంటనే అధికారులు అతన్ని పట్టుకుని విచారించగా ఈ విషయం తెలిసింది. ఇటీవల కాలంలో విమానాలకు బెదిరింపు కాల్స్ రావడం ఎక్కువ అయ్యింది. ఏది అసలు కాల్ లో, ఏది ఫేక్ కాల్ లో తెలియక పోలీసులు మాత్రం బాంబు బెదిరింపు కాల్స్ రావడంతో అప్రమత్తమై తనిఖీలు నిర్వహిస్తున్నారు.
