Munugode Bypoll: కేఏ పాల్ అంటే తెలుగు రాష్ట్రాల్లో తెలియని వారు ఎవరు ఉండరు. దేశ వ్యాప్తంగా పెద్ద పెద్ద నేతలకు, వివిధ దేశాల్లోని ప్రముఖులతోనూ ఆయనకు పరిచయాలు ఉన్నాయి. ఓ పదిహేనేళ్ల క్రితం వరకూ ఆయన కీర్తి బాగానే ఉండేది. అయితే ఆయన ప్రజా శాంతి పార్టీ స్థాపించిన నాటి నుండి ఆయన చేతలు, మాటలు హస్యాన్ని పండిస్తుండటంతో ఆయనలో మంచి కమేడియన్ ను ప్రజలు చూస్తున్నారు. గత సార్వత్రిక ఎన్నికల్లో నర్సాపురం లోక్ సభ స్థానం నుండి పోటీ చేసిన కేఏ పాల్ కు నోటా కంటే తక్కువగా ఓట్లు వచ్చాయి. రాష్ట్ర వ్యాప్తం గా అనేక నియోజకవర్గాల్లో ఆయన పార్టీ తరపున పోటీ చేసిన వారికి డిపాజిట్లు కూడా దక్కలేదు. నర్సాపురం పార్లమెంట్ నియోజకవర్గంలో నోటాకు 12వేలకుపైగా ఓట్లు రాగా కేఏ పాల్ కు మాత్రం కేవలం మూడు వేల ఓట్లు మాత్రమే వచ్చాయి. కానీ ఆయన మాటలు కోటలు దాటుతుంటాయి.
ఇప్పుడు ఆయన మునుగోడు ఉప ఎన్నికల్లో స్వతంత్ర అభ్యర్ధిగా బరిలో ఉండటంతో అక్కడి ప్రజలకు మంచి వినోదం లభిస్తొంది. ప్రజాశాంతి పార్టీ ఎన్నికల సంఘం నుండి గుర్తింపు రద్దు కావడంతో ఆయన స్వతంత్ర అభ్యర్ధిగా రంగంలో ఉన్నారు. గతంలో ప్రజా శాంతి పార్టీకి హెలికాఫ్టర్ గుర్తు కేటాయించేది ఈసీ. అయితే ఆయన ఇప్పుడు స్వతంత్ర అభ్యర్ధిగా రంగంలో ఉండటంతో ఉంగరం గుర్తు కేటాయించారు. ఎన్నికల ప్రచారం నిర్వహిస్తున్న కేఏ పాల్ .. తన మాటలతో ప్రజలను ఆకట్టుకుంటున్నారు. ఏ మాత్రం కార్యకర్తలు లేని కేఏ పాల్ .. ప్రధాన రాజకీయ పక్షాలు తన ముందు దిగ దుడుపే అన్నట్లుగా ప్రచారం చేసుకుంటున్నారు కేఏ పాల్. ఉప ఎన్నికల్లో తనదే గెలుపు అంటూ ఘంటాభజాయించి చెబుతున్నారు. తమకు ఉన్న హెలికాఫ్టర్ గుర్తును ఎవరికో ఇచ్చారనీ, అందుకే రిటర్నింగ్ అఫీసర్ ను తాను శపించాననీ, దీంతో ఆయనపై వేటు వేశారని చెప్పుకొచ్చారు కేఏ పాల్. వాస్తవానికి రోడ్ రోలర్ గుర్తు మార్పు వివాదంలో ఆర్ఓ పై ఈసీ చర్యలు తీసుకున్న సంగతి తెలిసిందే.
టీఆర్ఎస్, కాంగ్రెస్, బీజేపీ మూడు ప్రధాన పార్టీలు రెడ్డి సామాజిక వర్గానికే టికెట్లు ఇచ్చాయనీ, ఇతర సామాజిక వర్గాలను పట్టించుకోలేదని విమర్శించారు కేఏ పాల్. తాను కోమటిరెడ్డి రాజగోపాల్ రెడ్డిని కలిసినప్పుడు కూడా ఆయన అనుచరులు జై కేఏ పాల్ అన్నారని చెప్పుకున్నారు. ఉంగరం గుర్తుకే మన ఓటు అంటూ మునుగోడు ప్రజలు నినదిస్తున్నారని అన్నారు. తాను గెలిచిన ఆరు నెలల్లో ఒక యూనివర్శిటీ, ఒక కాలేజీ, ఒక హాస్పటల్ కట్టిస్తానని, మండలానికి వెయ్యి ఉద్యోగాలు ఇప్పిస్తానని హామీ ఇస్తున్నారు కేఏ పాల్. ఉప ఎన్నికల్లో కాంగ్రెస్ పార్టీకి డిపాజిట్ కూడా రాదని ఇప్పటికే తేలిపోయిందనీ, బీజేపీ, టీఆర్ఎస్ కు డిపాజిట్లు వస్తాయా లేదా అనే విషయం త్వరలోనే తేలుతుందని అన్నారు కేఏ పాల్. ఇలా తన నోటికి వచ్చినట్లుగా కేఏ పాల్ వాగ్దానాలు ఇస్తూ ప్రజలకు హస్యాన్ని పండిస్తున్నారు కేఏ పాల్.
