MAA Elections: మూవీ ఆర్టిస్ట్స్ అసోసియేషన్ (మా) ఎన్నికలు రసవత్తరంగా మారాయి. ప్రకాశ్ రాజ్, మంచు విష్ణు ప్యానెల్స్ మధ్య ఆరోపణలు, ప్రత్యారోపణల మాటల తూటాలతో హీట్ ఎక్కింది. బ్యాలెట్ విధానాన్ని విష్ణు ప్యానెల్ దుర్వినియోగం చేస్తోందంటూ ప్రకాశ్ రాజ్ ఆరోపణలు చేశారు. మా ఎన్నికల నియమావళి ఉల్లంఘించి విష్ణు వర్గంకు చెందిన వాళ్లు పోస్టల్ బ్యాలెట్ లు సేకరిస్తున్నారని ప్రకాశ్ రాజ్ పేర్కొన్నారు. దీనిపై ఆయన ఎన్నికల అధికారికి ఫిర్యాదు చేసిన సంగతి తెలిసిందే. అయితే ఈ ఆరోపణలను మంచు విష్ణుఖండించారు. ఇదే నేపథ్యంలో మంచు విష్ణు తమకు ఈవీఎం ద్వారా ఎన్నికపై నమ్మకం లేదని పేర్కొన్నారు. ఈవిఎంలను ట్యాంపరింగ్ చేసే అవకాశం ఉందని పేర్కొన్న విష్ణు ఈ మేరకు మా ఎన్నికల అధికారి కృష్ణమోహన్ కు లేఖ రాశారు. దీంతో పోస్టల్ బ్యాలెట్ విధానంలో ఎన్నికలు నిర్వహించనున్నట్లు కృష్ణమోహన్ ప్రకటించారు.
MAA Elections: బ్యాలెట్ పద్ధతిలోనే ఎన్నికలు
ఎన్నికల అధకారి కృష్ణమోహన్ దీనిపై సలహా తీసుకునేందుకు కృష్ణంరాజుతో భేటీ అయ్యారు. విష్ణు, ప్రకాశ్ రాజ్ చేసిన ప్రతిపాదనలను అసోసియేషన్ క్రమశిక్షణా సంఘం చైర్మన్ కృష్ణంరాజు దృష్టికి తీసుకువెళ్లారు. బ్యాలెట్ విధానంపై కృష్ణంరాజు మొగ్గు చూపారని ఎన్నికల అధికారి కృష్ణ మోహన్ తెలిపారు. అదే విధంగా సుప్రీం కోర్టు ఉత్తర్వుల మేరకు బ్యాలెట్ పద్దతితోనే ఎన్నికలు నిర్వహించనున్నట్లు ఆయన వెల్లడించారు.
ప్రకాశ్ రాజ్ పై నిప్పులు చెరిగిన విష్ణు
మువీ ఆర్టిస్ట్స్ అసోసియేషన్ (మా) ఎన్నికల పోలింగ్ ఈ నెల 10వ తేదీన జరగనుంది. సుమారు 950 మందికిపైగా అసోసియేషన్ సభ్యులకు ఓటు హక్కు ఉండగా ప్రకాశ్ రాజ్, విష్ణు ప్యానెల్ సభ్యులను కలిసి ఓట్లు అభ్యర్థిస్తున్నారు. ఇదే క్రమంలో విష్ణు ప్యానెల్ పై ప్రకాశ్ రాజ్, ప్రకాశ్ రాజ్ పై విష్ణు ఆరోపణలు, ప్రత్యారోపణలు చేసుకోవడంతో మా ఎన్నికలపై సర్వత్రా ఆసక్తి నెలకొంది. తెలుగు చిత్ర పరిశ్రమలో మునుపెన్నడూ లేని విధంగా పరిస్థితులు మారాయి అని అంటున్నారు. అసోసియేషన్ లోని సభ్యులు రెండు వర్గాలుగా విడిపోయారు. సభ్యులకు హామీలు ఇచ్చి గెలవడానికి కృషి చేయాలే కానీ అడ్డదారులు తొక్కడం, అక్రమాలకు పాల్పడటం ఏమిటంటూ విష్ణు వర్గంపై ప్రకాశ్ రాజ్ ప్రశ్నించారు. మరో పక్క మంచు విష్ణు నేడు మీడియా సమావేశం ఏర్పాటు చేసి ప్రకాశ్ రాజ్ పై తీవ్ర వ్యాఖ్యలు చేశారు. ప్రకాశ్ రాజ్ గురించి అటు కర్నాటకలో, తమిళనాడులో అడిగితే తెలుస్తుందని అన్నారు. సంఘాలకు తాళాలు వేయించిన ఘనత ఆయనదని, ఐక్యంగా ఉన్న సంఘాల్లో గొడవలు సృష్టించిన చరిత్ర ఆయనది అంటూ ఘాటు విమర్శలు చేశారు.