Suicide: హైదరాబాద్ జవహర్‌నగర్ లో విషాదం చోటుచేసుకుంది. ఓ ప్రేమ జంట ఆత్మహత్యాయత్నంకు పాల్పడింది. అయితే ఈ ఘటనలో యువకుడు మృతి చెందగా, యువతి స్వల్పగాయాలతో బయటపడంది. పెద్దలను ఎదిరించి పెళ్లి అయితే చేసుకున్నారు కానీ జీవితాన్ని ఈదలేకపోయారు. పెళ్లి చేసుకున్న కొద్ది రోజులకే తనువు చాలించాలనుకున్నారు. ఎదిగీ ఎదగని వయస్సులో తీసుకున్న తొందరపాటు నిర్ణయాల ఫలితం ఇది.
విషయంలోకి వెళితే… యూసఫ్ గుడకు చెందిన 17 ఏళ్ల యువకుడు ఇంటర్ మొదటి సంవత్సరం చదువుతున్నాడు. అదే ప్రాంతానికి చెందిన 20 ఏళ్ల యువతితో ప్రేమలో పట్టాడు. ఆ యువతి సినీ పరిశ్రమలో పని చేస్తున్నట్లు సమాచారం. వీరి పెళ్లికి పెద్దలు అంగీకరించలేదు. దీంతో వీరు జవహర్ నగర్ లో ఓ గది అద్దెకు తీసుకుని సహజీవనం చేస్తున్నారు. వారం రోజుల క్రితం ఆ గదిలోనే వారు పెళ్లి చేసుకున్నారు. అయితే రెండు రోజులుగా వీరి మధ్య గొడవలు జరిగినట్లు సమాచారం. వీరి మధ్య ఏర్పడిన మనస్పర్ధల కారణంగా ఇద్దరు తనువు చాలించాలని నిర్ణయించుకున్నారు.
Read More: Etela Jamuna: కేసిఆర్ సర్కార్ పై మాజీ మంత్రి ఈటెల సతీమణి జమున తీవ్ర వ్యాఖ్యలు..!!
వీరు అద్దెకు ఉంటున్న రూమ్ లో ఫ్యాన్ కు ఉరి వేసుకుని ఆత్మహత్యాయత్నంకు పాల్పడ్డారు. అయితే అదృష్టవశాత్తు ఫ్యాన్ కు కట్టిన చున్ని ఊడి కిందపడటంతో యువతి స్వల్ప గాయాలతో బయటపడింది. యువకుడు మృతి చెందాడు. విషయం తెలుసుకున్న పోలీసులు ఘటనా స్థలానికి చేరుకుని కేసు నమోదు చేసి దర్యాప్తు చేస్తున్నారు. మృతుడి తండ్రి పోలీస్ శాఖలో పని చేస్తున్నట్లు తెలుస్తోంది.
