అమరావతి: ఏపీలో మూడు రాజధానులను ఏర్పాటు చేయాలని భావిస్తున్న జగన్ సర్కార్.. జనవరి 20న ఏపీ శాసన సభ ప్రత్యేక సమావేశం నిర్వహించాలని నిర్ణయించింది. ఆరోజున హైపవర్ కమిటీ నివేదికను సభలో ప్రవేశపెట్టాలని ప్రభుత్వం భావిస్తోంది. రాజధాని సహా రాష్ట్రంలో పాలన వికేంద్రీకరణపై సభలో చర్చ జరగనుంది. జగన్ సర్కార్ ఏర్పాటు చేసిన జీఎన్ రావు, బీసీజీ కమిటీలు ఇచ్చిన నివేదికల్లో మూడు రాజధానుల ప్రతిపాదనలను చేసిన సంగతి తెలిసిందే. ఈ కమిటీలు సూచించిన అంశాలు, సిఫారసులపై అధ్యయనానికి రాష్ట్ర ప్రభుత్వం నియమించిన హైపవర్ కమిటీ ఇచ్చిన నివేదికను అసెంబ్లీ ప్రత్యేక సమావేశంలో ప్రవేశపెట్టనున్నట్టు తెలుస్తోంది.
అసెంబ్లీ సమావేశాలకంటే ముందే జనవరి 18న ఏపీ మంత్రివర్గం సమావేశం కానుంది. మూడు రాజధానులకు సంబంధించి కేబినెట్ భేటీలో ప్రధానంగా చర్చించనున్నట్లు తెలిసింది. ఈ భేటీలో రాజధానిపై కీలక నిర్ణయం తీసుకునే అవకాశముందని సమాచారం. జీఎన్ రావు, బీసీజీ కమిటీ ఇచ్చిన నివేదికలు, హైపవర్ కమిటీ సిఫారసులు, పాలన వికేంద్రీకరణపై మరోసారి దృష్టి సారించి కీలక నిర్ణయం తీసుకునే అవకాశముంది.
జీఎన్ రావు, బీసీజీ కమిటీలు ఇచ్చిన నివేదికలను మంత్రివర్గం ఆమోదిస్తే మాత్రం అమరావతిలో లెజిస్లేటివ్ క్యాపిటల్, విశాఖలో ఎగ్జిక్యూటివ్ క్యాపిటల్, కర్నూలులో శాశ్వత హైకోర్టు ఏర్పాటుకు ప్రకటన చేసే అవకాశం ఉంది. అదే సమయంలో అమరావతి రైతులకు భరోసాను ఇచ్చేలా జగన్ కొన్ని కీలక నిర్ణయాలు తీసుకునే అవకాశాలు కనిపిస్తున్నాయి.
ఏపీలో పాలన వికేంద్రీకరణ, రాజధాని రైతుల ప్రయోజనాలతో పాటు పలు కీలక అంశాలపై ఇప్పటికే హైపవర్ కమిటీ చర్చించింది. రాజధాని ప్రాంత రైతులు, జిల్లాలు, ప్రాంతాల వారీ అభివృద్ధి ప్రణాళికల రూపకల్పనపై కమిటీ చర్చించింది. రాష్ట్రంలోని 13 జిల్లాలకు సమాంతరంగా అభివృద్ధి జరగాలని కమిటీ సభ్యులు తెలిపారు. ప్రతి ఒక్కరి అభిప్రాయాలను కమిటీ పరిశీలిస్తోందని, తప్పకుండా రైతుల ప్రయోజనాలను కాపాడతామని కమిటీలోని మంత్రులు ఇప్పటికే స్పష్టం చేశారు.
మరోవైపు రాజధానిని అమరావతిని నుంచి తరలించొద్దని ఆప్రాంత రైతులు ఆందోళనలు కొనసాగుతున్నాయి. రాజధాని రైతులకు అండగా టీడీపీ అధినేత చంద్రబాబు పోరుబాటను మరింత ఉధృతం చేశారు. విపక్షాలను కలుపుకుని రాష్ట్రవ్యాప్తంగా అమరావతి రైతులకు అండగా మద్దతు కూడగడుతున్నారు. మరోపక్క జనసేన అధినేత పవన్ కల్యాణ్ కూడా రాజధాని విషయంలో కేంద్రం జోక్యం చేసుకోవాలని కోరారు. ఈ నేపథ్యంలో ప్రభుత్వ నిర్ణయంపై సర్వత్రా ఉత్కంఠ నెలకొంది.
