(న్యూస్ ఆర్బిట్ బ్యూరో)
అమరావతి: ఏపీలోని పేదింటి ఆడపడుచులకు సీఎం వైఎస్ జగన్మోహన్రెడ్డి శుభవార్త తెలిపారు. రాష్ట్ర వ్యాప్తంగా పెళ్లి కానుకుల కోసం పెండింగ్లో ఉన్న రూ.270 కోట్ల నిధులను ప్రభుత్వం విడుదల చేసింది. దాదాపు 22 నెలలగా ఎదురు చూస్తున్న జంటల వ్యక్తిగత అకౌంట్లలలోకి డబ్బులు జమకానున్నాయి.
పెంచిన నగదు శ్రీరామ నవమి నుండి అందజేత…
పేదింటి పిల్లల పెళ్లిళ్లలకు మరింత సాయం చేయాలన్న సీఎం వైఎస్ జగన్మోహన్రెడ్డి ఆశయం కార్యరూపం దాల్చింది. ఎన్నికల ప్రచారం, ఎన్నికల మేనిఫెస్టోలో చెప్పినట్లుగా ఎస్సీ, ఎస్టీ, బీసీ, మైనార్టీ, దివ్యాంగులకు చంద్రన్న పెళ్లి కానుకగా చెల్లిస్తున్న ప్రోత్సాహకాన్ని భారీగా పెంచి పథకాన్ని సరికొత్తగా వైఎస్సార్ పెళ్లి కానుకగా మార్చారు. పెంచిన నగదును రానున్న శ్రీరామ నవమి నుంచి అమలు చేయనున్నారు. గతంలో ఎస్సీలకు రూ.40 వేలు, ఎస్టీలకు రూ.50 వేలు పెళ్లి కానుక కింద ఇచ్చేవారు. ప్రస్తుతం వైఎస్సార్ పెళ్లి కానుక కింద వారందరికీ ఏకంగా లక్ష రూపాయలను ఇవ్వనున్నారు. ఎస్సీ, ఎస్టీ కులాంతర వివాహాలకు ఇస్తున్న రూ.75 వేల ను ఇప్పుడు రూ.1.20 లక్షలకు పెంచారు. బీసీ ఆడపడుచులకు ఇస్తున్న రూ.35 వేలను రూ.50 వేలకు, కులాంతర వివాహాలు చేసుకొనే ఆడపడుచులకు రూ.50 వేల నుంచి రూ.75 వేలకు పెంచారు. మైనార్టీలకు రూ.50 నుంచి రూ.లక్షకు, దివ్యాంగులకు రూ.లక్ష నుంచి రూ.లక్షన్నరకు పెంచుతూ నిర్ణయం తీసుకున్నారు.
భవన నిర్మాణ కార్మికులకు అయిదు రెట్లు పెంపు…
భవన నిర్మాణ కార్మికుల పెళ్లి కానుకను వైఎస్సార్ సీపీ ప్రభుత్వం భారీగా పెంచింది. ఏకంగా అయిదు రెట్లు పెంచి రూ.20 వేల నుంచి రూ.లక్షకు చేశారు.
ఎస్సీ, ఎస్టీ, బీసీ, మైనార్టీ వర్గాలతో పాటు ఆగ్రవర్ణ పేదలు ఎవరైనా భవన నిర్మాణ కార్మికులగా పనిచేస్తూ కార్మిక శాఖలో నమోదు చేసుకుంటే వారి కూతుర్లకు కూడా పెళ్లి కానుకను అమలు చేస్తున్నారు. అయితే భవన నిర్మాణ కార్మికులుగా నమోదు చేసుకొనే వారి సంఖ్య తక్కువగా ఉందని ఆధికారులు చెబుతున్నారు. అవగాహన లేకపోవటంతో ప్రభుత్వ సాయానికి వీరు దూరం అవుతున్నారంటున్నారు. భవన నిర్మాణ కార్మికులు దగ్గరలోని ఆసిస్టెంట్ లేబర్ ఆఫీసర్ కార్యాలయానికి వెళ్లి సంబంధిత పత్రాలు, తగిన రుసుం చెల్లించి గుర్తింపు కార్డు పొందవచ్చని ఆధికారులు తెలియచేస్తున్నారు.
పెంచిన పెళ్లి కానుక వివరాలు.
- ఎస్సీలకు రూ.40 వేల నుంచి రూ.లక్ష
- ఎస్సీ, ఎస్టీ కులాంతర వివాహానికి రూ.75 వేల నుంచి రూ. లక్షా 20 వేలు
- ఎస్టీలకు రూ.50వేల నుంచి రూ.లక్ష
- బీసీలకు రూ.35వేల నుంచి రూ.50 వేలు
- బీసీ కులాంతర వివాహానికి రూ.50 వేల నుంచి రూ.75 వేలు
- మైనార్టీలకు రూ.50 వేల నుంచి రూ.లక్ష
- దివ్యాంగులకు రూ.లక్ష నుంచి రూ. లక్షన్నర
- భవన నిర్మాణ కార్మికులకు రూ.20 వేల నుంచి రూ.లక్ష