(న్యూస్ ఆర్బిట్ డెస్క్)
సినీ తారలంటే అభిమానులకు ప్రాణం. వారితో ఫొటో దిగాలని ఆరాటపడుతుంటారు. అలాంటిది కళ్ళ ముందే సెలెబ్రిటీ కనిపిస్తే.. ఊరుకుంటారా? సెల్ఫీ కోసం ఎగబడతారు. సెల్ఫీ దిగిన సంఘటనలు మధురజ్ఞాపకాలుగా మిగిలిపోతాయని భావిస్తారు. అయితే, ఒక్కోసారి సెల్ఫీల కోసం ఫ్యాన్స్ చేసే పని సెలెబ్రిటీలకు చిరాకు తెప్పిస్తుంది. తాజాగా బాలీవుడ్‌ సూపర్‌స్టార్‌ సల్మాన్‌ఖాన్‌ ఇలాంటి వివాదంలోనే చిక్కుకున్నారు. తనతో సెల్ఫీ దిగడానికి ప్రయత్నించిన ఓ అభిమాని పట్ల ఆయన దురుసుగా ప్రవర్తించారు. గోవాలోని అంతర్జాతీయ విమానాశ్రయంలో ఈ సంఘటన జరిగింది. ఇందకు సంబంధించిన వీడియో ప్రస్తుతం వైరల్ అవుతోంది.
తన తాజా సినిమా షూటింగ్‌ కోసం సల్మాన్ గోవా విమానాశ్రయం వచ్చారు. ఎయిర్ పోర్టు గేటు నుంచి బయటకు వస్తుండగా ఆయన ముందు నిలబడి ఓ ఎయిర్‌పోర్టు ఉద్యోగి సెల్ఫీ దిగేందుకు ప్రయత్నించారు. తనను ఏమాత్రం అడగకుండా సెల్ఫీలు దిగుతుండటంతో ఆగ్రహానికి లోనైన సల్మాన్ అతని ఫోన్‌ లాక్కున్నారు. అయితే, అభిమాని పట్ల సల్మాన్ వ్యవహరించిన తీరును నెటిజన్లు తప్పు బడుతున్నారు.
https://www.instagram.com/p/B728Vf7gU_0/?utm_source=ig_embed
సల్మాన్ తో సెల్ఫీకి యత్నించిన వ్యక్తి ఎవరన్న విషయమై విమానాశ్రయ అధికారులు స్పష్టత నిచ్చారు. వైరల్ అయిన ఈ వీడియో ఆధారంగా ఈ ఘటనపై ఆరా తీసినట్టు ఓ సీనియర్ అధికారి చెప్పారు. సల్మాన్ తో సెల్ఫీ దిగేందుకు యత్నించిన వ్యక్తి విమానయాన సంస్థకు చెందిన గ్రౌండ్ స్టాఫ్ అని చెప్పారు. ఈ ఘటనపై ఎలాంటి కేసు నమోదు కాలేదని తెలిపారు.
