ఈ రోజుల్లో ఆన్ లైన్ షాపింగ్ చేయాలన్నా.. కొత్త కొత్త సినిమాలు చూడాలన్నా… డిజిటల్ వాలెట్ ద్వారా డబ్బులు చెల్లించాలన్నా.. అన్నింటిలోనూ అమెజాన్ దే హవా. అటు అమెజాన్ ఈ కామర్స్ ప్లాట్ ఫాంతో పాటు అమెజాన్ ప్రైమ్, అమెజాన్ మ్యూజిక్, అమెజాన్ పే.. అంటూ ఎన్నోరకాల సేవలను మనముందుకు తీసుకొచ్చింది.
తాజాగా అమెజాన్ యూజర్లకు మరో బంపర్ ఆఫర్ ను తీసుకొచ్చింది. అమెజాన్ అకౌంట్ ఉంటే చాలు.. అమెజాన్ పే ద్వారా డిజిటల్ గోల్డ్ కొనుక్కోవచ్చు. ప్రస్తుతం డిజిటల్ గోల్డ్ కు ఎంత డిమాండ్ ఉందో ప్రత్యేకంగా చెప్పుకోనక్కర్లేదు.
అమెజాన్ పే ప్రారంభించిన ఈ సర్వీస్ ద్వారా 5 రూపాయలు పెట్టి కూడా బంగారం కొనుక్కోవచ్చు. డిజిటల్ గోల్డ్ సర్వీస్ కోసం అమెజాన్.. సేఫ్ గోల్డ్ అనే సంస్థతో ఒప్పందం కుదుర్చుకున్నది. అనంతరం అమెజాన్ పేలో గోల్డ్ వాల్ట్ పేరుతో డిజిటల్ గోల్డ్ ఫీచర్ ను అందుబాటులోకి తీసుకొచ్చింది. కనీసం 5 రూపాయలు పెట్టి కూడా గోల్డ్ కొనుక్కునేలా ఈ ఫీచర్ ను తీసుకొచ్చారు.
ఇప్పటికే పేటీఎం, గూగుల్ పే, ఫోన్ పే, మొబిక్విక్ లాంటి డిజిటల్ వాలెట్స్ డిజిటల్ గోల్డ్ సర్వీసును అందిస్తున్నాయి. కాకపోతే.. అమెజాన్ పేలో డిజిటల్ గోల్డ్ ఫీచర్స్ మరింత సులువుగా ఉంటాయని.. యూజర్లకు అనుకూలంగా ఫీచర్లు ఉంటాయని అమెజాన్ తెలిపింది.
ప్రస్తుతం డిజిటల్ గోల్డ్ కు ఆదరణ బాగా పెరిగింది. పెళ్లిళ్ల సీజన్ లోనే కాకుండా అక్షయ తృతీయ లాంటి పండుగల సమయంలో డిజిటల్ గోల్డ్ ను కిలోలకు కిలోలు కొంటున్నారట. గత అక్షయ తృతీయ రోజు పేటీఎం ఏకంగా 37 కిలోల డిజిటల్ గోల్డ్ ను అమ్మిందట. ఫోన్ పే అయితే ఏకంగా 100 కిలోలు అమ్మిందట. వామ్మో.. జనాలు ఫిజికల్ గోల్డ్ ను వదిలేసి… డిజిటల్ గోల్డ్ మీద పడ్డట్టున్నారుగా ఇక. అందుకే.. డిజిటల్ వాలెట్స్ అన్నీ డిజిటల్ గోల్డ్ ఫీచర్ మీద ఆసక్తి చూపిస్తున్నాయి.