Heart Palpitations: గుండె దడ.. మనలో ప్రతి ఒక్కరికీ ఈ సమస్య ఎప్పుడో ఒకప్పుడు ఎదురై ఉంటుంది.. పరీక్షలకు వెళ్ళేప్పుడో, ఏ విషయం గురించైనా ఆందోళనతో ఎదురు చూసేటప్పుడో, ఏదైనా వినకూడని వినాల్సి వస్తుందో అప్పుడు గుండె దడ రావటం (Heart Palpitations) సహజం.. అయితే ఇది కొన్ని సార్లు సాధారణంగా కాకుండా ఇబ్బందికి గురి చేస్తుంది. అటువంటప్పుడు ఎలాంటి జాగ్రత్తలు తీసుకోవాలి..!? అందుకు గల కారణలు గురించి తెలుసుకుందాం..!!
దడ ఉన్న అన్ని సందర్భాల్లో గుండె (Heart ) కు ఏదో సమస్య వస్తుందని కాదు. మానసిక, శారీరక ఒత్తిడి (Stress) అనారోగ్యం వలన వస్తుంది. మరికొందరిలో డిహైడ్రేషన్ (Dehydration) ఉన్నప్పుడు వస్తుంది. అకస్మాత్తుగా లేవడం, నిలబడటం, కిందకు వంగడం, గుండె కు శ్రమను కలిగించే వాటి వలన గుండె దడ వస్తుంది. అటువంటప్పుడు ఒత్తిడికి దూరంగా ఉండాల్సిందే. ఒత్తిడి కలిగించే విషయాలకు దూరంగా ఉండాలి. మనసు ప్రశాంతంగా ఉండేలా చూసుకోవాలి. కేవలం గుండె దడగా ఉన్నప్పుడే కాకుండా రోజంతా మనసు ప్రశాంతంగా ఉండేలా చూసుకోవాలి. ఒత్తిడి కలిగించే ఆలోచనలకు దూరంగా ఉండాలి. ప్రతి రోజు కనీసం అరగంటైనా వ్యాయామం, ధ్యానం చేయాలి.
డిహైడ్రేషన్ వలన కూడా గుండె దడ వస్తుంది. అందుకని రోజు తప్పనిసరిగా 2 నుంచి 3 లీటర్ల నీటిని తాగాలి. నీటి శాతం ఎక్కువగా ఉండే పండ్లను తీసుకోవాలి. పుచ్చకాయ, కర్భుజ, కీర దోస, దానిమ్మ పండ్లు తినాలి. ఫ్రూట్ జ్యూస్ లను తాగాలి. కొబ్బరి బొండం నీళ్ళు, నిమ్మ రసం వంటివి ఎక్కువగా తీసుకోవాలి. గుండె వేగాన్ని పెంచే కెఫిన్ పదార్థాలకు దూరంగా ఉండాలి. ముఖ్యంగా కాఫీ తాగకూడదు. కూల్ డ్రింక్స్, టీ, చెక్కర ఎక్కువగా ఉండే పానీయాలు తాగకూడదు.
రక్త హీనత (Anemia) వలన శరీర కణజాలానికి ప్రాణవాయువు సరఫరా తగ్గి పోతుంది. అందువలన ఆయాసం, గుండె దడ వస్తుంది. థైరాయిడ్ (Thyroid) తో బాధ పడుతున్న వారిలో కూడా గుండె దడ వస్తుంది. కొందరి మహిళలలో బహిష్టు ఆగిపోయే సమయంలో హార్మోన్ ల విడుదల లోపం వలన రక్తప్రసరణ అదుపు తప్పి గుండె దడ వస్తుంది. ఉబ్బసం కోసం ఉపయోగించే ముందులు గుండె దడ ను కలిగిస్తాయి. ఈ సమస్యలను నియంత్రణలో ఉంచుకుంటే గుండె దడ రాకుండా చేసుకోవచ్చు.
గుండె దడగా ఉన్నప్పుడు చల్లని నీటితో ముఖం కడుక్కోవలి. ఊపిరి బిగబట్టి వదలాలి. గుండెలో విద్యుత్ స్పందనల తీరుతెన్నులు అస్తవ్యస్తమైన, కవాట సమస్యలు ఉన్నవారికి దడ వస్తుంది. ప్రత్యేకమైన కారణాలేవి లేకుండా గుండె దడగా అనిపిస్తుంటే నిర్లక్ష్యం చేయకూడదు. వెంటనే వైద్యుడిని సంప్రదించి తగిన జాగ్రత్తలు తీసుకోవాలి.
