భారతదేశం సుగంధ ద్రవ్యాలకు పుట్టినిల్లుగా భావిస్తారు. ఈ సుగంధ ద్రవ్యాలను వంటలలో వాడడం వల్ల ఎంతో సువాసన, రుచితో కూడిన వంటలు తయారు అవుతాయి. అటువంటి సుగంధ ద్రవ్యాలలో జాజికాయ కూడా ఒకటి. జాజికాయను ప్రతిరోజు మనం ఆహారపదార్థాలలో తీసుకోవడం వల్ల అనేక ఆరోగ్య ప్రయోజనాలను పొందవచ్చు. అంతేకాకుండా దీర్ఘకాలికంగా బాధపడుతున్న సమస్యల నుంచి విముక్తి పొందవచ్చు.జాజికాయను వాడటం వల్ల ఎలాంటి ఆరోగ్య ప్రయోజనాలు కలుగుతాయో ఇక్కడ తెలుసుకుందాం..
జాజికాయ ఎన్నో పోషక విలువలకు నిలయం. ఇందులో విటమిన్లు, కార్బోహైడ్రేట్లు, ప్రొటీన్లు, క్యాల్షియం ఐరన్ మెగ్నీషియం వంటి పోషక విలువలు పుష్కలంగా లభిస్తాయి. జాజికాయను ప్రతి రోజూ మన ఆహారంలో చేర్చుకోవడం వల్ల జీర్ణక్రియ రేటు మెరుగుపడుతుంది. అంతేకాకుండా మలబద్దకాన్ని నివారిస్తుంది.
చాలామంది నిద్రలేమి సమస్యతో బాధపడుతూ ఉంటారు. అలాంటి వారికి జాజికాయ ఒక గొప్ప వరంగా చెప్పవచ్చు. రాత్రి పడుకునే సమయంలో ఒక జాజికాయ పొడిని ఒక గ్లాసు గోరువెచ్చని పాలలో కలుపుకొని తాగడం వల్ల నిద్రలేమి సమస్య నుంచి విముక్తి పొందవచ్చు. జాజికాయ యాంటీ ఇన్ఫ్లమేటరీ గుణాలు అధికంగా ఉండటం వల్ల కీళ్ల నొప్పులు, కండరాల నొప్పులు, తగ్గిస్తుంది.
ఇందులో ఉన్న మిరిస్టిసిన్, ఎలిమిసిన్, సఫ్రోల్ వంటి రసాయనాలు ఈ నొప్పి చికిత్సకు ఎంతగానో ఉపయోగపడతాయి. అంతేకాకుండా ఇందులో ఉన్న యాంటీ బ్యాక్టీరియల్ గుణాలు మన నోటి నుండి వచ్చే దుర్వాసనను పోగొట్టడమే కాకుండా మరింత తాజాగా ఉంచుతుంది. అలాగే నోటి పుండ్లను నివారించడంలో జాజికాయ కీలక పాత్ర పోషిస్తుంది.
జాజికాయ లో విరివిగా లభించే కాల్షియం పొటాషియం మెగ్నీషియం ఐరన్ వంటి పోషకాలు అధిక రక్తపోటును నియంత్రించడమే కాకుండా,ఎముకలు బలంగా తయారవడానికి కాల్షియం ఎంతో తోడ్పడుతుంది. జాజి కాయ కాలేయ రుగ్మతలు, గాయాలు చికిత్స చేయడానికి ఉపయోగపడుతుంది. ఇంతటి పోషక విలువలు కలిగిన జాజికాయ ప్రతిరోజూ తీసుకోవడం వల్ల ఇన్ని ఆరోగ్య ప్రయోజనాలను మనం పొందవచ్చు.