Pawan Kalyan : పవర్ స్టార్ పవన్ కళ్యాణ్ మళ్లీ సినిమాల్లో తన సెకండ్ ఇన్నింగ్స్ ప్రారంభించిన తర్వాత వరుస ప్రాజెక్టులకు సంతకం పెట్టేసాడు. వరుసగా నాలుగు సినిమాల్లో నటిస్తున్న పవన్ కళ్యాణ్ ‘వకీల్ సాబ్’ ద్వారా చాలా గ్యాప్ తర్వాత మళ్లీ ప్రేక్షకుల ముందుకు రానున్నాడు. దీంతో ఈ సినిమాపై అభిమానుల్లో అంచనాలు తారస్థాయిలో ఉన్నాయి.
ఇక పవర్ స్టార్ నటిస్తున్న 27 సినిమా కు క్రియేటివ్ డైరెక్టర్ క్రిష్ జాగర్లమూడి దర్శకత్వం వహిస్తున్నాడు. చారిత్రాత్మక నేపథ్యంలో తెరకెక్కుతున్న ఈ సినిమాను సీనియర్ ప్రొడ్యూసర్ ఏఎమ్ రత్నం నిర్మిస్తున్నారు. ఈ చిత్రం టైటిల్ పై ఫిలింనగర్లో చాలా వార్తలు చక్కర్లు కొడుతున్నాయి. ‘విరూపాక్ష‘ అనే టైటిల్ ప్రచారంలో ఉన్న ఈ సినిమాకు ‘హర హర మహాదేవ‘ అనే టైటిల్ కూడా పరిశీలిస్తున్నట్లు ఉన్నట్లు తెలుస్తోంది అయితే సోషల్ మీడియాలో మాత్రం ఈ సినిమా ‘గజదొంగ‘ బందిపోటు’ అనే పేర్లు వినిపిస్తున్నాయి.
అసలు ఇవన్నీ కాదని ప్రాచుర్యంలో ఉన్న రెండు టైటిల్స్ ను మిక్స్ చేసి ‘హరహర వీరమల్లు‘ అనే టైటిల్ ఫిక్స్ చేసినట్లు తెలిసింది. ఈ సినిమా మొఘల్ సామ్రాజ్యంలో ఒక బందిపోటు కథ చుట్టూ తిరుగుతుందని తెలుస్తోంది. ఈ చారిత్రాత్మక చిత్రాన్ని భారీ సెట్లతో ఆ కాలం నాటి స్థానికతను ప్రతిబింబించేలా రూపొందిస్తున్నట్లు చిత్ర వర్గాల సమాచారం.
ఇప్పటి వరకు 25 సినిమాల్లో నటించిన పవన్ కళ్యాణ్ కెరీర్లోనే ఇది మొట్టమొదటి చారిత్రాత్మక చిత్రం కావడం కూడా విశేషం. అలాగే దర్శకుడు క్రిష్ కూడా చాలా గ్యాప్ తర్వాత ఈ సినిమా చేస్తున్నాడు. ప్రస్తుతం షూటింగ్ ముమ్మరంగా జరుపుకుంటున్న ఈ చిత్రం యొక్క టైటిల్ శివరాత్రి రోజున అధికారికంగా ప్రకటిస్తారని సన్నిహిత వర్గాల సమాచారం. మరి ఏ టైటిల్ ఫైనల్ అవుతుందో వేచి చూడాలి….