(న్యూస్ ఆర్బిట్ డెస్క్)
మనుషులు వదిలే చెత్త అడవుల్లో ఉండే ప్రాణులకు కూడా తిప్పలు తెచ్చిపెడుతున్నది. ఇష్టం వచ్చినట్టుగా ప్లాస్టిక్ బాటిళ్లను, ఇతర ఖాళీ కంటైనర్లనూ ఎక్కడపడితే అక్కడ పడేయడంతో అవి రకరకాల ఇబ్బందులు, ఆఖరికి ప్రాణాపాయం కూడా కలిగిస్తున్నాయి. తాజాగా ఒడిశాలోని మయూరభంజ్‌లోని అటవీ ప్రాంతంలో ఇలాంటి ఘటన జరిగింది. ఓ పెద్ద నాగుపాము తల బీరు క్యాన్లో ఇరుక్కుపోవడంతో అవస్థలు పడింది.
అటవీ ప్రాంతంలో ఎవరో మద్యం సేవించి ఆ బీరు క్యాన్లను అక్కడే పడేశారు. అటుగా వచ్చిన ఓ పాము దాంట్లో తలదూర్చింది. అది అందులోనే ఇరుక్కుపోవడంతో అటూ ఇటూ తిరుగుతూ ఇబ్బందులు పడింది. దీన్ని గుర్తించిన ఇద్దరు వ్యక్తులు కత్తిని ఉపయోగించి డబ్బాను తెరిచారు. తర్వాత పామును ఓ లోహపు కడ్డీ సాయంతో అడవిలోకి తీసుకెళ్లి పుట్ట వద్ద వదిలిపెట్టారు. క్యాన్‌ నుంచి బయటకు వచ్చిన పాము కోపంతో బుసలు కొట్టడం కనిపించింది. ప్రస్తుతం ఈ వీడియో సోషల్ మీడియాలో వైరల్‌గా మారింది.
