(న్యూస్ ఆర్బిట్ డెస్క్)
ఇండియా నుంచి వెళ్లిన మరో డాన్స్ బృందం అమెరికన్లను ఒక ఊపు ఊపింది. పాపులర్ షో ‘అమెరికాస్ గాట్ టాలెంట్’ నిర్వహించిన ఆడిషన్ రౌండ్లో ఈ బృందం పాల్గొన్నది. బృందం పేరు ‘వియ్ ఆన్బీటబుల్’. వీరి డాన్స్ వేగం, మెరుపు, సమన్వయం, విన్యాసాలు చూసి మంత్రముగ్దులయిన జడ్జీలు డాన్స్ అయిపోగానే ఒక్కుమ్మడిగా లేచి అభినందించారు.
ఈ బృందంలో 12 నుంచి 27 ఏళ్ల వయస్సు సభ్యులు మొత్తం 28 మంది ఉన్నారు. డాన్స్ ప్రదర్శన ముందు జడ్జీలు వారిని ముంబైలో జీవితం గురించి ప్రశ్నించారు. ముంబైలో జీవితం చాలా కష్టంగా ఉంటుందనీ, తమలో చాలామంది మురికివాడలలో నివసిస్తారనీ ఆ బృందం నాయకుడు చెప్పాడు. డాన్స్ తమకు ఆటవిడుపు వంటిదనీ, అందులోనే సేదదీరుతామనీ అతను అన్నాడు.
రణవీర్ సింగ్, దీపికా పదుకొనే నటించిన బాజీరావు మస్తానీ సినిమాలోని మల్హరీ పాటకు వారు డాన్స్ చేశారు. డాన్స్ ముందు ట్రూప్ మొత్తం గణపతి బప్పా మోరియా అని అరిచారు. ఈ షోకు గాబ్రియెల్ యూనియన్, హోవీ మెండిల్, జూలియన్ హ్యూ, సైమన్ కోవెల్ జడ్జీలుగా ఉన్నారు.
https://youtu.be/OWCDJnnxOSY