విద్యార్థులకు గుండ్లు కొట్టించి..!

(న్యూస్ అర్బిట్ డెస్క్)

ర్యాగింగ్‌ నిరోధానికి ప్రభుత్వాలు కఠిన చట్టాలు అమలు చేస్తున్నప్పటికీ.. సీనియర్ విద్యార్థుల్లో మాత్రం మార్పు రావడం లేదు. తాజాగా ఉత్తర్‌ ప్రదేశ్‌లో మరోసారి ర్యాగింగ్ భూతం బుసలు కొట్టింది. సీనియర్‌ వైద్య విద్యార్థులు రెచ్చిపోయారు. సైఫాయ్ మెడికల్ యూనివర్సిటీలో సీనియర్ విద్యార్థులు జూనియర్ల పట్ల అమానుషంగా ప్రవర్తించారు. వర్సిటీలో కొత్తగా చేరిన ఫస్ట్ ఇయర్ విద్యార్థులతో అత్యంత దారుణంగా వ్యవహరించారు. గుండ్లు కొట్టించుకుని తమకు సెల్యూట్ చేయాలని అల్టిమేటం ఇచ్చారు. తెల్లటి వస్త్రాలు ధరించాలని, కళాశాలకు వచ్చేటప్పుడు ఒకే లైన్‌లో రావాలన్నారు. దీంతో సుమారు 150 మంది ఫస్ట్ ఇయర్‌ విద్యార్థులు గుండ్లు కొట్టించుకుని సీనియర్లకు సెల్యూట్ చేశారు. దీనిని కొందరు వీడియో తీసి.. సోషల్‌ మీడియాలో పెట్టడంతో అవి వైరల్‌ అయ్యాయి. దీంతో యూనివర్సిటీ తీరుపై సర్వత్రా విమర్శలు వ్యక్తం కావడంతో డీన్‌ రాజ్‌ కుమార్‌ స్పందించారు. యూనివర్సిటీ పరిసరాల్లో ర్యాగింగ్‌కు చోటే లేదని, విద్యార్థులపై నిఘా ఉంచామని తెలిపారు. ఈ ఘటనకు కారమైన కొందరు సీనియర్‌ విద్యార్థులను సస్పెండ్‌ చేశామన్నారు.