ఇలాంటి పరిస్థితి ‘గంటా ‘కి ఫస్ట్ టైం ! ‘లోటస్ పాండ్’ కాకుంటే “లోటస్ ” నేనట !!

అలవోకగా పార్టీలు మారే మాజీ మంత్రి గంటా శ్రీనివాసరావు కి టైం ఇప్పుడు అనుకూలంగా లేదు. ఆయన ఇప్పుడు వైసీపీలోకి వెళ్లాలనుకుంటున్నా అనేక అడ్డంకులు ఎదురవుతున్నాయట.

ప్రకాశం జిల్లాకు చెందిన ముందుగా కాంగ్రెస్ పార్టీ లోక్ సభ టికెట్ కోసం ప్రయత్నాలు సాగించారు. అయితే అనూహ్యంగా టిడిపి ఆయనను ఆదరించి అనకాపల్లి లోక్‌సభ టికెట్ ఇవ్వడంతో తొలిసారిగా ఎంపీ అయ్యారు. 2004 అసెంబ్లీ ఎన్నికల్లో ఆయన ఎమ్మెల్యేగా టిడిపి తరఫున చోడవరం నుండి గెలుపొందారు. మెగాస్టార్ చిరంజీవికి అత్యంత సన్నిహితుడైన గంటా శ్రీనివాసరావు ఆయన ప్రజారాజ్యం పార్టీ పెట్టినప్పుడు అందులోకి వెళ్లి అనకాపల్లి నుండి ఎమ్మెల్యేగా గెలిచారు. అయితే ప్రజారాజ్యం పార్టీ కాంగ్రెస్ లో విలీనం అయ్యాక ఆయన కిరణ్ కుమార్ రెడ్డి మంత్రివర్గంలో కేబినెట్ పదవి కూడా పొందారు. 2014 ఎన్నికలకు ముందు ఆయన మళ్లీ టిడిపిలో చేరి భీమిలి అసెంబ్లీ నియోజకవర్గం నుంచి ఎమ్మెల్యేగా గెలుపొంది చంద్రబాబు ప్రభుత్వ హయాంలో మంత్రిగా చేశారు.

మొన్నటి ఎన్నికల్లో విశాఖపట్నం నార్త్ నియోజకవర్గం నుంచి టీడీపీ అభ్యర్థిగా గెలిచారు.అయితే రాష్ట్రంలో రాజకీయ సమీకరణలు మారిపోయేసరికి ఆయన మళ్లీ పార్టీ మారాలనుకుంటున్నప్పటికీ అందుకు అనుకూలమైన వాతావరణం కనిపించడం లేదు .ఇలాంటి పరిస్థితి ఆయనకు ఎదురుకావడం ఇదే మొదటిసారి అని రాజకీయ పరిశీలకులు చెబుతున్నారు.ఆయన వైసీపీలో చేరడం దాదాపు ఖాయమని అనేకసార్లు వార్తలు వచ్చినప్పటికీ అది ఎప్పటికప్పుడు వాయిదా పడుతూ వస్తోంది .గంటా శ్రీనివాసరావు వైసీపీలో చేరికకు అతి పెద్ద బ్రేక్ ఎంపీ విజయసాయిరెడ్డి అని అందరికీ తెలిసిందే.

ఆయన జగన్ కి అత్యంత సన్నిహితుడు, అంతే కాదు, ఆయన కుటుంబ సభ్యుడి కంటే కూడా ఎక్కువ. ఆ సంగతి గంటా శ్రీనివాసరావు మరిచిపోయి సజ్జల రామక్రిష్ణారెడ్డి, బొత్స సత్యనారాయణల ద్వారా జగన్ ని ప్రసన్నం చేసుకున్నారు. కానీ విజయసాయిరెడ్డికి మాత్రం మొత్తం సీన్ రివర్స్ చేశారు.ఇక గంటా శ్రీనివాసరావు రాజకీయ మంత్రాంగానికి మరో మారు పదును పెడుతున్నారట‌. ఆయన ఈసారి నేరుగా విజయసాయిరెడ్డినే ప్రసన్నం చేసుకునేందుకు పావులు కదుపుతున్నారని టాక్. మొదట్లో ఈ ఇద్దరి మధ్యన రిలేషన్స్ బాగానే ఉండేవని అంటారు. గంటా శ్రీనివాసరావును పార్టీలోకి తీసుకువచ్చే పనిని విజయసాయిరెడ్డి తలకెత్తుకున్నారని చెబుతారు. అయితే గంటా సన్నిహితులు విజయసాయిరెడ్డి మీద సోషల్ మీడియాలో అసభ్య పోస్టులు పెట్టి ట్రోల్ చేశారని అంటారు.

పైగా కుల సమీకరణలు బయటకు తెచ్చి గంటా బొత్సతో దోస్తీ చేయడం వంటి పరిణామాల వల్ల తనకే చివరకు ఎసరు వస్తుందని భావించి సాయిరెడ్డి గంటా శ్రీనివాసరావును అడ్డుకున్నారని అంటారు. ఇపుడు గంటా విజయసాయిరెడ్డినే మంచి చేసుకోవాలనుకున్నా ఆయన ఇంత జరిగాక ఓకే అంటారా అన్న చర్చ కూడా ఉంది. ఈఏడాది చివరి వరకు చూసి వైసీపీ తలుపులు తెరుచుకోకపోతే గంటా శ్రీనివాసరావు బిజెపి వైపు వెళ్లిపోయే అవకాశం ఉందని ఆయన సన్నిహిత వర్గాలు చెబుతున్నాయి.